حسب وعدہ 2018ءتئیں بجلی دی لوڈ شیڈنگ ختم کرڈتی ویسی، اقتصادی راہداری دے تحت منصوبیںدے ثمرات سامنڑے آندے پے ہن ،چشمہ تھری منصوبہ نیوکلیئر سائنس تے ٹیکنالوجی دے میدان اچ پاک چین تعاون دا منہ بولیندا ثبوت ہے
چشمہ ۔ 28 دسمبر (اے پی پی) وزیراعظم محمد نواز شریف توانائی دی گھٹکی، دہشت گردی دی لعنت سمیت ملک کوں درپیش سارے چیلنجز نال چنگے طریقے نال نبڑنڑ دے عزم دا اعادہ کریندے ہوئیں آکھیا ہے جو وطن عزیز توں لوڈشیڈنگ دا خاتمہ اساڈی پہلی ترجیح اے ،درپیش مسلے ہک ہک کر تے حل تھیندے پے ہن ۔ملک مشکلات توں نکلدا پے ،رہی سہی مشکلات اتے دہشت گردی وی مک ویسی ۔2018تئیں نہ صرف ملک اچ لوڈشیڈنگ مک ویسی بلکہ سستی بجلی وی دستیاب ہوسی ۔دھرنے تے احتجاج دی ملک سانگے ضیان ہن ۔اساں صحیح رستے تے ویندے پیوں ۔دھرنیں تے احتجاج نال ملکی ترقی اچ روڑے نہ اٹکائے ونجن ،ملک تے رحم کیتا ونجے اتے محض سیاست دی خاطر ملک دے مفاد کوں قربان نہ کیتا ونجے ۔انہاں اے گالھ بدھ کوں 340میگاواٹ چشمہ تھری نیوکلیئر پاور پلانٹ دی افتتاحی تقریب توں خطاب کریندے ہوئیں آکھی ۔وفاقی وزیرپانڑیںتے بجلی خواجہ محمد آصف، وزیر مملکت پانڑیں تے بجلی عابد شیر علی ، وزیراعظم مشیر خارجہ امور سرتاج عزیزاتے پاکستان اٹامک انرجی کمیشن دے چیئرمین محمد نعیم وی تقریب اچ موجود ہن۔وزیراعظم آکھیا جو اساں اقتدار اچ آئے تاں معیشت دا برا حال ہا ،توانائی دی گھٹکی ہئی ۔18،18 گھنٹے دی لوڈ شیڈنگ تھیندی ہئی ملک دہشت گردی دی وکیڑ اچ ہا ۔انہاں آکھیا جو اساں قوم کوں مسلیں توں کڈھنڑ سانگے عزم دا اظہار کیا ایں سلسلے اچ عملی اقدامات کیتے ۔وزیراعظم آکھیا جو قوم کوں لوڈشیڈنگ توں نجات ڈیواونڑ سانگے اساں جیں سفر دا آغاز کیتا اللہ سئیں دا شکر ہے جو ایں سلسلے اچ اج ہک سنگ میل پار کر گھدا ہے ۔۔ چشمہ تھری نیوکلیئر پاور پلانٹ دے پورا تھیونڑ نال منصوبے توں 340 میگاواٹ بجلی قومی گرڈ اچ شامل تھیونڑ تے پوری قوم کوںمبارخ ڈینداں ۔ انہاں آکھیا جو اے منصوبہ نیوکلیئر سائنس و ٹیکنالوجی دے میدان اچ پاک چین تعاون دا منہ بولیندا ثبوت ہے ۔ڈوہیں ملکاں وچال چنگے تے تعمیری تعاون تے سانجھ اتے اخوت نال ڈوہیں ملکاں دے مفاد اچ ہے بلکہ خطے سانگے ہک نویں دور دا آغاز تھیسی ۔انہاںآکھیا جو میکوں پوری امید ہے جو چشمہ نیو کلیئر پاور پلانٹ وی مقررہ مدت توں پہلے 2017دے ادھ توں پہلے بجلی دی پیداوار شروع کر ڈیسی ۔وزیراعظم آکھیا جو میکوں خوشگوار یاداں اچ اے گالھ وی شامل ہے جو چینی ساختہ پہلے پاور پلانٹ چشمہ یونٹ ون دی تعمیر دا معاہدہ وی اساڈے پہلے دور حکومت اچ طے پاتا تے ایں ڈوہیں ملکاں وچال نیو کلیئر توانائی دے شعبے اچ تعاون دی بنیاد فراہم کیتی ۔
