وزیراعظم محمد نواز شریف دے اعزاز اچ بوسنیا ہرزیگووینا دی پارلیمنٹ اچ شاندار استقبالیہ تقریب

اسلام آباد ۔ 21 دسمبر (اے پی پی) وزیراعظم محمد نواز شریف دے اعزاز اچ بوسنیا ہرزیگووینا دی پارلیمنٹ اچ شاندار استقبالیہ تقریب تھئی ہے ۔ وزیراعظم دے بدھ کوں سرکاری دورے دے شروع اچ انسٹی ٹیوشنز بلڈنگ۔ پارلیمنٹ آف بوسنیا ہرزیگووینا پجنڑ تے باقاعدہ پرتپاک استقبالیہ تقریب تھئی ہے جتھاں چیئرمین آف دی کونسل آف منسٹرز (وزیراعظم) ڈاکٹر ڈینس زیودے وچ انہاں دااستقبال کیتا۔ ایں موقعے تے ڈوہائیں اگوانڑاں پرتپاک انداز اچ مصافحہ کیتا اتے ہک بئے کیتے نیک تمناواں دا اظہار کیتا۔ تقریب اچ ڈوہائیں ملکاں دے ترانیاں دیاں دھناں وی وجایاں گئن۔ ایں موقعے تے بوسنیا ہرزیگووینا دی مسلح افواج دے ہک چاق و چوبند دستے وزیراعظم محمد نواز شریف کوں سلامی پیش کیتی۔ ایں موقعے تے وزیراعظم گارڈ آف آنر دا معائنہ وی کیتا۔ بعد اچ ڈوہائیں اگوانڑاں کلہی ملاقات دے علاوہ وفود دی سطح تے وی گالھ مہاڑ کیتی ۔