اسلام آباد ۔7 دسمبر (اے پی پی) پاکستان مسلم لیگ (ن) دے رہنما اتے وزیر مملکت عابد شیر علی آکھیا ہے جو پاناما لیکس دی جنگ سچ اتے کوڑ وچال ہے ایں جنگ اچ سچ دی فتح تھیسی ۔نجی ٹی وی چینل دے مطابق بدھ کوں سپریم کورٹ دے باہر وں میڈیا نال گالھ مہاڑ کریندے ہوئیں انہاں آکھیا جو تحریک انصاف کوڑ دی بنیاد تے سیاست کریندی پئی ہے تاں جو اے جنگ سچ تے کوڑ وچال ہے اتے ایندے اچ سچ دی فتح تھیسی ۔عابد شیر علی آکھیا جو پی ٹی آئی تے شیخ رشید دے کوڑ اتے کوڑی سیاست دا جنازہ سپریم کورٹ توں نکل آسی اتے کھیر دا کھیر تے پانڑیں دا پانڑیں تھی ویسی ۔انہاں درخواست کیتی جو پاناما لیکس دی سماعت روزانہ دی بنیاد تے کیتی ونجے ۔وزیر مملکت تحریک انصاف تے تنقید کریندے ہوئیں آکھیا جو کاغذات لہراونڑ آلیں دے ثبوت کتھاں گن ،عدالت ثبوت منگدی پئی ہے مگر ہنڑ تئیں ثبوت کائنی ڈتے گے ۔عابد شیر علی آکھیا جو عمران خان ولوں وکیل بدالنڑ دے باوجود کجھ وی ثابت کائنی تھیا ۔
