باد رگاز (سوئٹزرلینڈ) ۔ 17 جنوری (اے پی پی) وزیراعظم محمد نواز شریف آکھے جو ا و دنیا کوں پاکستان دیاں نمایاں معاشی ترقی بارے آگاہ کرنڑ کیتے عالمی اقتصادی فورم آئے ہئیں ، کجھ سال پہلے معیشت تباہی دے نیڑے ہئی اتے ہنڑ عالمی مالیاتی برادری معیشت دی مثبت تبدیلی کوں تسلیم کریندی پئی ہے ۔ زیورخ توں اتھاںپجنڑ دے فوری بعد آپنڑیں ہوٹل اچ ذرائع ابلاغ دے نمائندیاں نال گالھ مہاڑ کریندے پئے ہن ۔ انہاں آکھیا جو اﷲ تعالیٰ دے فضل نال ملک دے معاشی اشاریے بہوں مثبت ہن ،جیہڑے جو ہر آئے ڈینھ بئے بہتر تھیندے پئے ہن ۔ وزیراعظم جیہڑے جو ورلڈ اکنامک فورم دے سالانہ اجلاس اچ شرکت سانگے سوئٹزرلینڈ آئے ہن ، انہاں آکھیا جو ملک تیز رفتاری نال معاشی ترقی کریندا پئے جیندی عالمی میڈیا اتے عالمی مالیاتی ادارے تعریف کریندے ریہے ہن ۔ وزیراعظم آندے کجھ سالیں اچ معروف کمپنیاں اتے مالیاتی اداریں دے سربراہواں نال بہوں ساریاں ملاقاتاں کریسن، اتے انہاں کوں سرمایہ کاری دے زبردست موقعے اتے انٹرنیشنل برانڈز کیتے روشن امکانات بارے آگاہ کریسن۔ عالمی مالیاتی اداریاں ولوں مثبت ریٹنگ دے بعد پاکستان اچ غیر ملکی سرمایہ کاراں بہوں ودھ دلچسپی گھدی ہے ۔ نواز شریف آکھے جو عالمی ادارے پاکستان دی معیشت دے متعلق حوصلہ افزاء اشارے ڈیندے پئے ہن اتے ملک اچ غیر ملکی سرمایہ کاری آندی پئی ہے ، افراط زر دی سطح گھٹ ترین ہے جڈانجو جی ڈی پی اچ ودھارا تھئے ، محصولات دی وصولی اچ نمایاں بہتری تھئی ہے ، چائنہ پاکستان اکنامک کوریڈور اُتے تیزی نال اگوہیں تھیندی پئی ہے ، جیہڑے جو نہ صرف پاکستان جڈانجو سارے خطے کیتے ہک گیم چینجر ہے۔ انہاں آکھیا جو ملک دے سارے علاقیاں اچ راہداری اُتے کم جاری ہے اتے پاکستان دے عوام ایندے توں حقیقی طور تے فیدہ چیسن۔ انہاں آکھیا جو بھاویں کئی بندہ بلوچستان، خیبرپختونخوا، سندھ، پنجاب، آزاد جموں و کشمیر یا گلگت بلتستان اچ کتھائیں وی راہندے تاں اوں کوں برابر دا فیدہ تھیسی ، اتے ملک اچ زبردست ترقی تھیسی ۔ پاکستان اچ ترقی اتے عام آدمی تئیں ایندے اثرات دی منتقلی بارے ہک سوال دے جواب اچ انہاں آکھیا جو لوکیں دیاں زندگیاں اچ وڈی سماجی تے معاشی بہتری آندی ہے ۔
