پاکستان خطے دے سارے ملکاں دے نال پرامن بقائے باہمی تے یقین رکھیندا ہے
پاک چین اقتصادی راہداری علاقے اچ مواصلاتی رابطے تے سانجھی خوشحالی دی اساڈی جستجو دا محور ہے
اجلاس اچ وزیرخزانہ، وزیر داخلہ، چیف آف آرمی سٹاف، ڈی جی آئی ایس آئی، سرتاج عزیز، طارق فاطمی ،لیفٹیننٹ جنرل (ر) ناصر خان جنجوعہ ، وزیر اعظم دے سیکرٹری، سینئر حکام دی شرکت
اسلام آباد ۔ 3 جنوری (اے پی پی) وزیر اعظم محمد نواز شریف ایں امر کوں نشابر کیتا جو پاکستان خطے سے سارے ملکاں کوں پر امن بقائے باہمی تے یقین رکھیندا ہے تے ایندے نال باہمی طور تے مفید اتے مضبوط رابطے استوار کرنڑ چاہندا ہے ۔انہاں اے گالھ منگل کوں وزیراعظم ہاﺅس اچ اعلیٰ سطح تے اجلاس توں خطاب کریندے ہوئیں آکھی ۔اجلاس اچ پاکستان دے اپنڑے ہمسائیں اتے تزویراتی شراکت داراں دے نال تعلقات دی موجودہ صورت حال دا جائزہ گھدا گیا ۔اجلاس اچ خارجہ تعلقات دے حوالے نال مختلف چیلنجز دے جواب اچ پالیسی آپشنز دا وی جائزہ گھدا گیا ۔اجلاس دے دوران علاقائی ،داخلی تے باہرلی سلامتی دی صورت حال متعلق امور تے توجہ ڈتی گی ۔ہمسایہ ملکاں دے نال ودھ چنگے تعلقات تے علاقائی استحکام سانگے آندے روڈ میپ تے خطے اتے ایندے توں باہرووں سارے ملکاں دے نال سانجھے طور تے مفید تعلقات برقرار رکھنڑ دا وی جائزہ گھدا گیا ۔ وزیر اعظم نواز شریف آکھیا جوپر امن بقائے باہمی ، باہمی احترام اتے اقتصادی طورتے مضبوط خطہ اساڈا سانجھا مقصد ہوونڑ اں چاہیدا ہے اساکوں ایں مقصد دے حصول سانگے کوشش کرنڑیں چاہیدی ہے۔ انہاں آکھیا جو اے ایں صورت اچ ممکن تھی سگدا ہے جڈاں اساں امن ، ترقی اتے خوشحالی دی اپنڑی خواہشات نال وابستگی دامظاہرہ کروں ۔ وزیر اعظم آکھیا جو پاک چین اقتصادی راہداری علاقے اچ مواصلاتی رابطیں تے مشترکہ خوشحالی دی اساڈی جستجو دا محور ہے۔ اجلاس اچ وزیرخزانہ اسحاق ڈار، وزیر داخلہ چوہدری نثار علی خان ، چیف آف آرمی سٹاف قمر جاوید باجوہ، ڈی جی آئی ایس آئی لیفٹیننٹ نوید مختار ، وزیر اعظم دے مشیر خارجہ امور سرتاج عزیز، وزیراعظم دے معاون خصوصی طارق فاطمی ، قومی سلامتی مشیر لیفٹیننٹ جنرل (ر) ناصر خان جنجوعہ ، وزیر اعظم دے سیکرٹری اتے بئے سینئر حکام شرکت کیتی۔
