وزیر مملکت اطلاعات مریم اورنگزیب دی سپریم کورٹ دے باہر میڈیا نال گالھ مہاڑ

اسلام آباد ۔ 26 جنوری (اے پی پی)وزیر مملکت اطلاعات، نشریات تے قومی ورثہ مریم اورنگزیب آکھیا جو مریم نواز دی کفالت ہونڑ دا کوڑا الزام وی اج مک گئے ،مریم نواز مالی معالیاں اچ خود مختار ہن اتے باقاعدگی نال ٹیکس ڈیندین ،عمران خان دے بنڑائے گئے ڈوجھے ابہام وی جلدی مک ویسن۔عمران خان پہلی آلی کار ہنڑ وی الزام لاونڑ دے بعد بھجنڑ دا رستہ گولیندے ودن،الزام ثابت کرنڑ سانگے ثبوت لازمی ہوندن جئیں دا مقصد کیس لڑنڑاں ہوندے او عدالت اچ ثبوت وی پیش کریندن ۔او خمیس کوں سپریم کورٹ دے باہر میڈیا نال گالھ مہاڑ کریندی پئی ہن ۔انہاں آکھیا جو مریم نواز ہک خودمختار تریمت ہن ۔آپنڑاں انکم ٹیکس بھریندن اتے ویلتھ ٹیکس دے نال ساری دستاویزات عدالت اچ جمع کراڈتی گئین ۔انہاں آکھیا جو مریم نواز دے خرچیاں اے انہاں دے ٹیکس ریٹرن اچ عمران خان شک پا کراہیں کوڑی سیاست کریندن ۔اج عدالت اچ انہاں دی پوری وضاحت تھی گئی اے۔انہاں آکھیا جو مریم نواز دی ذاتی انکم اے اتے انہاں دے سارے خرچے امہاں دی انکم دے مطابق ہن اتے ایں وضاحت نال کفالت دا مسئلہ حل تھی وی ویندے ۔انہاں آکھیا جو اج وضاحت دے بعدوزیراعظم محمد نواز شریف دا ناں ایں کیس توں وی نکل ویندے۔عمران خان ولون وزیراعظم تے لاتے گئے بئے الزام وی اساڈے تریجھے وکیل ولوں دلائل ڈیونڑ دے بعد مُک ویسن۔انہاں یقین کریندیں ہوئیں آکھیا جو انشاء اللہ ہنڑ عمران خان سپریم کورٹ توں وی بھج ویسن کیونجو انہاں دا مقصد عدالت دے اندر کیس لڑنڑاں ہوندے او ثبوت پیش کرین ۔عدالت دے باہر آکراہیں کوڑی سیاست نی کریندے۔