اسلام آباد ۔21 جنوری (اے پی پی)کرم ایجنسی دے ہیڈکوارٹرز پارا چنار دی سبزی منڈی اچ چھنڑ چھنڑ دی سویل تھیونڑآلے بم دھماکے اچ 20 توں ودھ بندے شہید جڈانجو 70 توں ودھ زخمی تھی گئے ہن ۔ دھماکہ خیز موادسبزی منڈی اچ فروٹ کریٹ اچ رکھیا گیا ہئی ۔ شدیدزخمیاں کوں آر می دے ہیلی کاپٹراں دے ذریعے پشاورمنتقل کیتا گیا، دھماکے دے بعدسیکیورٹی فورسز علاقے اچ سرچ آپریشن شروع کرڈتا۔ سرکاری ذرائع دے مطابق دھماکہ خیز مواد شرپسنداں ولوں سبزی منڈی اچ ہک فروٹ کریٹ اچ رکھیا گیا ہئی، جیکوں سویل 8 وج تے 30 منٹ اُتے اوں ویلھے پھٹاڈتا گیا جئیں ویلھے اتھاں لین دین کیتے آونڑآلیاں لوکا ں دا ودھ رش ہئی ۔ دھماکے دے بعد سیکورٹی فورسز علاقے کوں گھیرے اچ گھن تے امدادی کاروائیاں شروع کرڈتن۔ ہسپتال ذرائع دے مطابق ہنڑ تئیں 78 زخمیاں کوں ہسپتال گھن آیا گئے ،جنہاں اچوں 20 دے قریب زخمیاں کوں ،جنہاں دی حالت تشویشناک ہئی ،کوں پشاور منتقل کرڈتا گئے ۔ سبزی منڈی اچ دھماکے دے واقعے اچ شہید اتے زخمی تھیونڑآلیاں اچ منڈی اچ سبزی تے بھل ویچنڑآلے اتے خریدار شامل ہن ۔ حکام ڈسایا جو بہوں تکھے جاں بحق تھیونڑآلیاں دی فہرست جاری کرڈتی ویسی تانجو وارث آپنڑیں شہید پیاریاں دی شناخت کرسگن۔ حادثے دے بعد علاقے اچ سیکیورٹی سخت کرڈتی گئی اتے علاقے کوں سیل کرڈتا گئے ۔ حکام دے مطابق عالقہ اچ سرچ آپریشن جاری ہے جڈانجو ایں ویلے تئیں کئی وی گرفتاری عمل اچ کائنی گھن آئی ۔
