اسلام آباد ۔26 جنوری (اے پی پی) پاکستان مسلم لیگ (ن) دے رہنما وزیر مملکت کیڈ ڈاکٹر طارق فضل چوہدری آکھیا جو مریم نواز دے خلاف پی ٹی آئی دا مقدمہ کوڑا ہے، عمران خان وڈا لیڈر بنڑیا پھردا ہے مگر مریم نواز توں ڈردا ہے۔ خمیس کوں سپریم کورٹ دے باہروں میڈیا نال گالھ مہاڑ کریندے ہوئیں انہاں آکھیا جو پاکستان دی تاریخ اچ ایندے توں پہلے وی سیاستداناں تے الزامات لگدے رہیے ہن مگر کہیں عدالت یا میڈیا تے سامنڑے آونڑ گوارہ کائنی کیتا جڈاں جوپاناما پیپرز ایجھا مقدمہ ہے جیں اچ وزیر اعظم اتے انہاں دیاں ترائے سنلاں دا احتساب کیتا ویندا پے۔ ڈاکٹر طارق فضل آکھیا جو مخالفاں ولوں لاتے گے الزام کوڑے ہن تے پی ٹی آئی کوئی وی ثبوت پیش کائنی کر سگی ، ہنڑ کیس وزیر اعظم دے بالاں دے حوالے نال اگی تے چلدا پے جیں اچ مریم نواز کوں وزیر اعظم دے زیر کفالت ثابت کرنڑ دی کوشش کیتی ویندی پئی ہے مگر ایں حوالے نال وی تحریک انصاف کوئی ثبوت عدالت اچ پیش کائنی کر سگی ۔ انہاںآکھیا جو مریم نواز شادی شدہ ہن تے انہاں دی زرعی اراضی دے حوالے نال سارے ثبوت انہاں دے وکیل عدالت اچ داخل کر ڈتے ہن ،مریم نواز وزیر اعظم دے زیر کفالت کائنی۔ انھاں آکھیا جو پی ٹی آئی ولوں مریم نوازدے خلاف کیس بالکل کوڑا ہے کیوں جو او کڈاہیں وی کہیں سرکاری عہدے تے رہیا ں ہن تے نہ ہی انہاں د پراپر ٹی دے حوالے نال کوئی جھیڑا سامنڑے آیا ہے ۔انہاں آکھیا جو تحریک انصاف کوڑ کوں سچ ثابت کرنڑ چاہندی ہے ۔
