چیف جسٹس آف پاکستان میاں ثاقب نثار دا سارک لاء تنظیم دی 25 ویں سالگرہ دے موقعے تے تھیونڑ آلی تقریب نال خطاب

کراچی ۔28 جنوری (اے پی پی) چیف جسٹس آف پاکستان جسٹس میاں ثاقب نثار آکھے جو ہر سائل دا حق ہے جو اوں کوں انصاف ملے، تکھے اتے تیز انصاف ڈیونڑ عدلیہ دی ترجیح ہے، بنیادی حقوق اُتے عمل درآمد کراونڑاں وی عدلیہ دا فرض ہے، جسٹس نسیم حسین شاہ دا قنون دی بالادستی کیتے نمایاں کردار ہے، جسٹس نسیم حسین شاہ کئی اہم فیصلے ڈتے جیہڑے جو رہنمائی کریندے راہسن۔ اے گالہیں انہاں چھنڑ چھنڑ کوں مقامی ہوٹل اچ تھیونڑآلے سارک لاء تنظیم دی 25 ویں سالگرہ دے موقعے تے خطاب کریندے ہوئیں آکھیاں۔ ایں موقعے تے سارک کانفرنس دے صدر محمود مانڈوی والا، جسٹس آصف سعید خان کھوسہ، چیف جسٹس سری لنکا سری پوون، بھارتی سپریم کورٹ دے وکیل وینو گوپال نیپل اتے بھارت اتے سری لنکا دے بئے مقررین وی خطاب کیتا۔ کانفرنس دا آغاز جسٹس نسیم حسن شاہ مرحوم دی یاد اچ لیکچر توں تھیا اتے سارک خطے اچ کامیابیاں اتے ناکامیاں دے موضوع اُتے بحث دے نال کانفرنس مُک گئی ۔ چیف جسٹس آف پاکستان جسٹس ثاقب نثار آکھیا جو سارک لاء کانفرنس اچ شرکت خوشی دی گالھ ہے ۔ انہاں آکھیا جو سماجی انصاف کو ںیقینی بنڑاونڑ عدلیہ دی بنیادی ذمہ داری ہے۔ انہاں آکھیا جو حال ہی اچ سپریم کورٹ طیبہ پر تشدد دا نوٹس گھدے ۔ انہاں آکھیا جو مقدمیاں دے غیر ضروری التواء توں بچنڑ دیاں کوششاں کرنڑیاں چاہیدیاں ہن ۔ چیف جسٹس آف پاکستان آکھیا جو سارک ملکاں دی تنظیم قنون دی بالادستی دیاں کوششاں سانگے بہترین پلیٹ فارم ہے، خطے اچ قنون دی بالادستی کیتے بار اتے بینچ اہم کردار ادا کرسگدے ہن ، اساکوں سارک دی طرح دے پلیٹ فارم توں فیدہ چاونڑاں چاہیدے ۔