اسلام آباد ۔ 22 فروری (اے پی پی) مسلم لیگ (ن)دے سینیٹر لیفٹیننٹ جنرل( ر) عبدالقیوم آکھیا ہے جو مودی انتظامیہ پاکستان کوں غیر مستحکم کرنڑ چاہندی ہے اساں دہشت گردی دی لعنت کوں مکاں ڈیسوں۔ ریڈیو پاکستان نال گالھ مہاڑ کریندے ہوئیں انہاں آکھیا جو ہک سوچے سمجھے منصوبے دے تحت پاکستان تے نفسیاتی جنگ مسلط کیتی ویندی پئی ہے ،پاکستانی با ہمت تے زندہ قوم ہن تے دہشت گردی دے خلاف جاری جنگ اچ پاکستان قوم دنیا اچ ساریں توں ودھ قربانیاں ڈتیاںہن ۔انہاں آکھیا جو دنیا دے کہیں وی ملک اچ دہشت گردی دا واقعہ تھیندا ہے تاں ایندا سٹاک ایکسچینج بہہ ویندا ہے ،معیشت تباہ تھی ویندی ہے ،اللہ سئیں دا شکرہے جو پاکستان دی معیشت اچ چنگائی آندی پئی ہے کاروبار چلدا پیا ہے ،سٹاک ایکسچینج دے انڈیکس کوں عروج تے ڈٹھا ویندا پیا ہے تے باہرلے سرمایہ کار وی پاکستان اچ سرمایہ کاری کریندے پئے ہن اے گالھ بھارت کوں ہضم نی تھیندی پئی ۔مودی تے بھارتی خفیہ ادارے پاکستان کوں غیر مستحکم کرنڑ سانگے افغانستان دی سرزمین استعمال کریندے پے ہن
