اسلام آباد ۔ 23 فروری (اے پی پی) دفتر خارجہ دے ترجمان آکھیا ہے جو دہشت گردی پاکستان تے افغانستان دی سانجھی دشمن ہے اتے ڈوہیں ملک ایندے توں متاثر تھیندے پے ہن ۔سرحد دے ڈوہیں پاسے دہشت گرداں دی نقل و حرکت روکنڑ سانگے چنگے بارڈر مینجمنٹ ضروری ہے ۔الزام لاونڑ کہیں وی مسلے دا حل کائنی ۔دشمن افغانستان دی اندرلی صورت حال توں فائد ہ چا تے افغان سرزمین کوں پاکستان اچ دہشت گرداں سانگے استعمال کریندا پی اہے ۔ایکو سربراہ اجلا س اچ اعلیٰ سطح تے سارے رکن ملکاں شرکت دی تصدیق کیتی ہے ۔اجلاس یکم مارچ کوں اسلام آباد اچ تھیندا پیا ہے ۔ سربراہ اجلاس توں پہلے رکن ملکاں دے وزیر خارجہ اتے سینئر حکام تے منعقد ہوسی ۔دفتر خارجہ دے ترجمان محمد نفیس زکریا خمیس کو ں ہفتہ وار بریفنگ دے دوران صحافیاں دے مختلف سوالاں دے جواب ڈیندے ہوئیں آکھیا ہے جو حکومت دہشت گرداں نال نبڑنڑ سانگے پکے اقدامات کریندی پئی ہے ۔ایں سلسلے اچ وزیراعظم پوری طاقت نال دہشت گرداںنال نبڑنڑ سانگے ہدایات جاری کیتیاں ہن ۔افغانستان توں متعلق سوال دے جواب اچ ترجمان آکھیا جو دہشت گردی پاکستان تے افغانستان دی سانجھی دشمن ہے ڈوہیں ملک ایندے توں متاثر تھیندے پے ہن ۔ترجمان افغانستان اچ دائمی امن دے قیام سانگے چار فریقی رابطہ گروپ نال رل تے کم کرنڑ تے زور ڈتا ۔انہاں آکھیا جو افغانستان تے پاکستان وچال معاملات تعمیری تے چنگے اقدامات نال حل کرنڑ دی ضرورت ہے۔دہشت گردی دے اجوکے واقعتا اچ بھارت دے ملوث ہوونڑ متعلق ہک سوال د ا جواب ڈیندے ہوئیں انہاں آکھیا جو متعلقہ حکام تحقیقات کریندے پے ہن تاں جو پاکستان اچ دہشت گردی دے واقعات اچ دہشت گرداں دی مالی معاونت دی فراہمی بھارت دے ملوث ہوونڑ دی گاھ ہنڑ کہیں توں لکی ہوئی کائنی ۔ترجمان آکھیاجو بھارت کوں احساس کرنڑاں ہوسی جو خطے اچ امن تے استحکام خود ایندے مفاد اچ چنگاں ہے ۔
