اسلام آباد ۔ 27 فروری (اے پی پی) سیکرٹری خارجہ اعزاز احمد چوہدری آکھیا جو اقتصادی تعاون تنظیم سربراہ اجلاس اچ توانائی،انفرا سٹرکچر اتے تجارتی سیکٹرز تے توجہ ڈتی ویسی۔ای سی او تیر ہویں سربراہ اجلاس بارے اسلام آباد ڈیکلریشن دامسودہ بنڑ گئے ۔پنج سربراہان مملکت،ترائے حکومتی سربراہان ،ہک نائب وزیر اعظم اتے ہک خصوصی سفارتکار شریک تھیسن۔سنوار کوں ای سی او حکام دے ڈو ڈینھ وار اجلاس دے چھیکڑ تے میڈیا کوں بریفنگ ڈیندیں ہوئیں انہاں آخھیا جو اجلاس اچ ای سی او دے تیرہویں اجلاس دے ایجنڈے سانگے سفارشات بنڑا گھدی گئین ۔انہاں سفارشاں کوں اج منگل دے ڈینھ کونسل آف منسٹرز دے اجلاس اچ پیش کیتا ویسی جئیں دی منظوری دے بعد اے سفارشاں سربراہ دے اجلاس دے ایجنڈے دا حصہ ہوسن۔ سیکرٹری خارجہ اعزاز احمدچوہدری آکھیا جو سربراہ اجلاس اچ ای سی او رکن ملکاں وچال رابطیاں اتے تعاون دی نویں راہواں گولی ویسن۔انہاں آکھیا جو چین پاکستان اقتصادی راہداری ہک عظیم منصوبہ اے جئیں نال پورے خطے کوں فائدہ تھیسی۔کوریڈور پورے خطے سانگے ترقی تے خوشحالی دی نوید اے۔ہک سوال دے جواب اچ انہاں آکھیا جو کوئی ملک پاکستان کوں کلھا نی کر سگدا،نہ ای ایجھی کوششاں اچ کامیاب تھیسی۔
