اسلام آباد ۔ 10 فروری (اے پی پی) حکومت چین پاکستان اقتصادی راہداری دے خصوصی اقتصادی زونز متعلق امور اچ معاونت سانگے سرمایہ کاری بورڈ اسلام آباد اچ ہک سیل قائم کر ڈتا ہے۔پورے ملک توں ہنڑ تئیں 41 خصوصی اقتصادی زونز دی نشاندہی کیتی گی ہے جیں اچوں ہک ہک گلگت بلتستان، آزاد کشمیر اتے اسلام آباد اچ شامل ہن۔سندھ اچ خیرپور خصوصی اقتصادی زون، کورنگی کریک انڈسٹریل پارک اتے بن قاسم انڈسٹریل پارک ، پنجاب اچ قائداعظم اپیرل پارک شیخوپورہ ، ایم تھری انڈسٹریل سٹی فیصل آباد، ویلوایڈڈ سٹی فیصل آباد اتے خیبرپختونخوا اچ حطار اقتصادی زون ہری پور شامل ہن۔جمعے کوں وزارت منصوبہ بندی تے ترقیات دے حکام ”اے پی پی“ کوں ڈسایا جو چھیویں جے سی سی اجلاس اچ پاک چین صنعتی تعاون دے شعبے اچ کم مزید تکھا کرنڑ دا فیصلہ کیتا گیا ہے ۔ پاک چین صنعتی تعاون دے تحت صوبیں ولوں منتخب9 زونز دی شمولیت دا فیصلہ تھیا،ایں مقصد سانگے صوبیں مختلف جہیں دی نشاندہی کیتی ہئی جیں اچ خیبر پختونخوا ولوںرشکئی اکنامک زون اتے سندھ ولوں چائنہ اکنامک زون داریجی، بلوچستان ولوں بوستان اکنامک زون اتے پنجاب ولوں چائنہ اکنامک زون شیخوپورہ، گلگت بلتستان ولوں مقپوندتے گلگت جڈاں جو کشمیر ولوں بھمبر صنعتی زون کوں شامل کرنڑ دی تجویز ڈتی گی ہے ،دارالحکومت اسلام آباد اچ آئی سی ٹی ماڈل انڈسٹریل زون اتے پورٹ قاسم اچ پاکستان سٹیل میل دی اراضی تے انڈسٹریل پارک بنڑاونڑ جڈاں جو فاٹا ولوں مومند ماربل انڈسٹریل زون بنڑائے ویسن۔ سی پیک دے ڈوجھے مرحلے اچ چین دے تعاون نال پاکستان اچ صنعتی زون قائم کیتے ویسن ۔ انہاںڈسایا جو گوادر فری زون تے پورٹ ڈویلپمنٹ دے مختلف منصوبیں اتے گوادر ووکیشنل انسٹی ٹیوٹ دے تعمیراتی کم کوں مزید تکھا کرنڑ دا فیصلہ کیتا گیا ہاے ۔انہاں ڈسایا جو گوادر فری زون اچ سرمایہ کاری دا سلسلہ شروع تھی گیا ہے جتھاں سٹیل ، پٹروکیمیکلز تے بیاں صنعتاں دے قیام تے کم شروع تھی گیا ہے۔
