اسلام آباد ۔ 28 فروری (اے پی پی) صدر مملکت دی ذال بیگم محمودہ ممنون حسین نویں نسل کوں اخلاقی اقدار توں روشناس کراونڑ ،انہاں کردار سازی اتے انہاں کوںمعیاری تعلیم نال روشناس کراونڑ دی ضرورت تے زور ڈیندے ہوئیں آکھیا ہے جو اسلام اساکوں زندگی گذارنڑ دا پورا ضابطہ ڈتا ہے اسلامی تعلیمات تے عمل کر تے اساکوں اپنڑے معاشرے کوںہک مثالی معاشرہ بنڑا سگدوں ۔ انہاں خیالاں دا اظہار انہاں منگل کوںاتھاں ایوان صدر اچ اسلام آباد ماڈل سکول دی طالبات نال خطاب کریندے ہوئیں کیتا ۔ بیگم محمودہ ممنون حسین طالبات دی تربیت سانگے لیکچرز دا سلسلہ شروع کیتا ہے جیں اچ مختلف سکولاں دی طالبات کوں سڈ تے انہاں دے فرائض نال روشناس کرایا ویندا ہے تاں جو او ملک دی ترقی اچ اپنڑاں کردار چنگے طریقے نال نبھا سگن ۔ بیگم محمودہ ممنون حسین آکھیا جو اسلام اساکوں ہک پورے ضابطہ حیات ڈیندا ہے اساڈے دین اچ نہ صرف اخلاقیات دی پوری تعلیم ڈتی ویندی ہے بلکہ انفرادی تے اجتماعی سطح تے زندگی گزارنڑ سانگے انسان کوں پوری رہنمائی وی ڈتی گی ہے ۔ انہاںآکھیا جو اسلام اساکوں اخلاقی اقدار تے عمل کرنڑ دی تلقین کریندا ہے تے مسلماناں کوں انہاں دے دین یکجہتی، ایمانداری اتے عزت تے وقار دی تعلیم ڈتی ہے ۔ انہاں آکھیا جو اسلام دے زریں اصولاں تے عمل کر تے اساں معاشرے کوں ہک مثالی معاشرے اچ تبدیل کر سگدوں ۔ بیگم محمودہ ممنون حسین ایں موقع تے طالبات ولوں سوال دے جواب وی ڈتے۔ خطاب دے بعد او طالبات اچ گھل مل گئیاں۔ طالبات ایں موقع تے انہاں اپنڑیاں نصابی سرگرمیاں بارے ڈسایا ۔
