وزیراعظم محمد نواز شریف ترکی دے 3 ڈینھ دے دورے تے روانہ

علاقائی اتے بین الاقوامی معاملات تے ترک قیادت دے نال وسیع تر مشاورت کریسن
خاتون اول بیگم کلثوم نواز، وفاقی وزیر پٹرولیم و قدرتی وسائل شاہد خاقان عباسی، وزیر تجارت انجینئرخرم دستگیر اتے معاون خصوصی خارجہ امور طارق فاطمی وزیراعظم دے نال ہن
اسلام آباد ۔ 22 فروری (اے پی پی) وزیراعظم محمد نواز شریف بدھ کو ں ترکی دے ترائے ڈینھ تے دورے تے روانہ تھی گے ۔وزیراعظم پاکستان ترکی دی اعلیٰ سطح دی سٹریٹجک تعاون کونسل (ایچ ایل ایس سی سی)دے پنجویں اجلاس اچ شرکت کریسن ۔ خاتون اول بیگم کلثوم نواز، وفاقی وزیر پٹرولیم تے قدرتی وسائل شاہد خاقان عباسی، وزیر تجارت انجینئرخرم دستگیر اتے وزیراعظم دے معاون خصوصی خارجہ امور طارق فاطمی وی وزیراعظم دے نال ہن ۔اپنڑے دورے دے دوران وزیراعظم مختلف ڈو پاسے علاقائی تے بین الاقوامی معاملات تے ترک قیادت دے نال وسیع تر مشاورت اتے تبادلہ خیال کریسن ۔وزیراعظم نواز شریف ترک وزیرا عظم بن علی یلدرم دے نال خمیس کوں انقرہ اچ پاک ترک اعلیٰ سطح دی سٹریٹجک تعاون کونسل دے پنجویں اجلاس دی مشترکہ صدارت کریسن ۔پاک ترک اعلیٰ سطح دی تعاون کونسل دا قیام 2009اچ ڈوہیں ملکاں وچال اعلیٰ سیاسی سطح تے مشاورت سانگے فریم ورک دے طور تے عمل اچ لاتا گیا ہے ۔اے میکنزم ڈو طرفہ قیادت کوں سٹریٹجک فوکس اتے رہنمائی فراہم کریندا ہے اتے مستقبل سانگے ہک وژن ترتیب ڈیونڑ اچ معاونت کریندا ہے ۔ کونسل دے تحت 6 مشترکہ ورکنگ گروپس کم کریندے پے ہن جیں اچ تجارت، توانائی، بینکنگ اتے فنانس، مواصلات، ریلوے، تعلیم اتے ثقافت تے سیاحت دے شعبے شامل ہن۔ کونسل دے دسمبر 2010ئ، مئی 2012ئ، ستمبر 2013ءاتے فروری 2015ءاچ چار اجلاس تھی گے ہن۔وزیراعظم نواز شریف دا دورہ ترکی اتے پاک ترک اعلیٰ سطح دی سٹریٹجک تعاون کونسل دے پنجویں اجلاس اچ شرکت نال ڈوہیں برادر ملکاں وچال تاریخی اتے آزمودہ تعلقات کوں مزید ودھارا ملسی اتے ڈوہیں ملکاں وچال مختلف شعبیں اچ تعلقات مزید مستحکم تھیسن ۔