اسلام آباد ۔ 15 فروری (اے پی پی)ملک دی سیاسی تے عسکری قیادت ایں عزم دا اظہار کیتے جو فوج،سول آرمڈ فورسز اتے پولیس دے آپریشنز دے فائدے ضائع کائنا تھیونڑ ڈیسوں اتے ریاست ایں گالھ کوں یقینی بنڑیسی جو دہشت گرد ولا سر نہ چا سگن۔ایں بارے کٹھ بدھ کوں اتھاں وزیراعظم ہائوس اچ وزیراعظم محمد نواز شریف دی صدارت اچ سکیورٹی اجلاس اچ کیتا گئیا۔اجلاس اچ ملک دی سکیورٹی صورتحال دا جائزہ گھدا گئیا۔وزیراعظم دے میڈیا آفس دے بیان دے مطابق اجلاس ایں عزم دا اظہار کیتا جو ملک یا باہرلے ملک توں تھیونڑ آلی دہشت گردی دا خاتمہ کیتا ویسی اتے ملک دے امن تے سلامتی سانگے خطرہ دا باعث بنڑنڑ آلے دہشت گرداں کوں ریاست دی طاقت نال کچلیا ویسی۔اجلاس اچ وزیر داخلہ چوہدری نثار علی خان، وفاقی وزیر خزانہ سینیٹر محمد اسحاق ڈار، بری فوج دے سربراہ جنرل قمر جاوید باجوہ، چیف آف جنرل سٹاف لیفٹیننٹ جنرل بلال اکبر، نیشنل سکیورٹی ایڈوائزر لیفٹیننٹ جنرل (ر) ناصر خان جنجوعہ، ڈی جی کانٹر ٹیررازم، ڈی جی آئی بی تے بئے سینئر حکام شریک تھیے۔اجلاس لاہور،مہمند ایجنسی پشاور اتے کوئٹہ دے اجوکے دہشت گردیاں دی مذمت کیتی اتے عظیم قومی ہیروز کوں خراج عقیدت پیش کیتا جنہاں پاکستان دے پر امن مستقبل سانگے آپنڑی جاناں قربان کیتی۔
