وفاقی وزیر خزانہ سینیٹر اسحاق ڈار دی صدارت اچ وزارت خزانہ، سٹیٹ بینک اتے ایف بی آر وچال رابطے بارے جائزہ اجلاس

اسلام آباد ۔ 10 فروری (اے پی پی) وفاقی وزیر خزانہ سینیٹر اسحاق ڈار آکھے جو اقتصادی اہداف دے حصول کیتے اداریاں دے کم اچ ہم آہنگی وڈی اہمیت رکھیندی ہے جیندے نال سارے ملک کوں فیدہ تھیسی ۔ او جمعے کوں اتھاں وزارت خزانہ، سٹیٹ بینک آف پاکستان اتے فیڈرل بورڈ آف ریونیو وچال رابطے بارے انتظامات دا جائزہ گھنڑ کیتے تھیونڑ آلے اجلاس دی صدارت کریندے پئے ہن ۔ گورنر سٹیٹ بینک اشرف محمود وتھرا، سیکرٹری خزانہ اتے ایف بی آر دے چیئرمین اجلاس اچ شرکت کیتی اتے وزیر خزانہ کوں متعلقہ اداریاں ولوں کوآرڈینیشن سانگے کیتے گئے اقدامات بارے ڈسایا ۔ وزیر خزانہ انہاں اقدامات دی تعریف کیتی اتے آکھیا جو اداریاں وچال چنگی ہم آہنگی حکومتی کماں کوں چنگے طریقے چلاونڑ کیتے لازمی ہے ۔ انہاں اجلاس دے شرکاء اُتے زور ڈتا جو او آمدن اتے اخراجات بارے مؤثر حل تلاش کرنڑ کیتے اقدامات کرن۔