وفاقی وزیر پانڑیں تے بجلی خواجہ محمد آصف دی نیپرا ایکٹ اچ ترمیم اتے سیلاب توں بچائو دے منصوبے دے جائزہ اجلاس دے بعد میڈیا نال گالھ مہاڑ

اسلام آباد ۔ 10 فروری (اے پی پی) وفاقی وزیر برائے پانڑیں تے بجلی خواجہ محمد آصف آکھے جو سارے صوبیاں وچال پانڑیں بارے مسلیاں دے حل کیتے اتفاق رائے حاصل کرگھدا ویسی ۔ او جمعے کوں اتھاں نیشنل الیکٹرک پاور ریگولیٹری اتھارٹی ایکٹ اچ ترامیم اتے سیلاب توں بچائو دے منصوبے دا جائزہ گھنڑ بارے اجلاس دے بعد میڈیا دے نمائندیاں نال گالھ مہاڑ کریندے پئے ہن ۔ انہاں آکھیا جو نیپرا ایکٹ اچ ترمیم اتے سیلاب توں بچائو دے 10 سالہ منصوبے و واٹر پالیسی بارے مسلیاں دے حل بارے نمایاں اگوہیں تھئی ہے ۔ انہاں آکھیا جو صوبیاں دے تحفظات دور کرنڑکیتے ہک بیا اجلاس کیتا ویسی ۔ انہاں آکھیا جو مشترکہ مفادات کونسل دی ہدایات دے مطابق آج پہلا اجلاس ہئی ۔ انہاں آکھیا جو وزارت پانڑیں تے بجلی اتے نیپرا وچال کئی اختلاف کائنی ۔ ایں موقعے تے بلوچستان دے وزیراعلیٰ ثناء اﷲ زہری آکھیا جو وفاق نال کجھ معاملیاں اُتے اتفاق تھی گئے اتے امید ہے جو ایندے مثبت نتیجے سامنڑیں امسن ۔ وزیراعلیٰ خیبرپختونخوا پرویز خٹک آکھیا جو آپنڑیں تحفظات بارے وفاقی حکومت کوں ڈساڈتے ۔ ایں توں پہلے وفاقی وزیر پانڑیں تے بجلی خواجہ محمد آصف دی صدارت اچ مشترکہ مفادات کونسل دے فیصلے دی روشنی اچ صوبائی حکومتاں دا اجلاس تھیا۔ اجلاس اچ خیبرپختونخوا اتے بلوچستان دے وزرائے اعلیٰ دے علاوہ پنجاب، سندھ اتے بلوچستان دے چیف سیکرٹریز وی شرکت کیتی۔ اجلاس اچ ایں گالھ دے اتفاق کیتا گئے جو بجلی دے نظام دی فعالیت اتے پائیداریت یقینی بنڑاونڑ کیتے نیپرا قنون اچ ترمیم کیتی ویسی تانجو ملک اچ انرجی سکیورٹی دی صورتحال کوں چنگا کیتا ونج سگے ۔ وفاقی اتے صوبائی حکومتاں دے نمائندیاں نیپرا دی ساخت اتے انتظامی اختیارات کو ںمضبوط بنڑاونڑ کیتے اقدامات کرنڑ اُتے اتفاق کیتا۔ اجلاس اچ سول عدالتاں اچ مقدمہ بازی دا بار گھٹ کرنڑ سانگے ہک اپیلٹ ٹربیونل بنڑاونڑ دی سفارش کیتی گئی جیہڑا جو ٹیکنیکل اتے فنانشل ممبرز اُتے مشتمل ہوسی جڈانجو ہائی کورٹ دے سابق جج ایندے سربراہ ہوسن۔