اسلام آباد ۔ 13 فروری (اے پی پی) وزیر مملکت برائے اطلاعات’نشریات و قومی ورثہ مریم اورنگزیب پاکستان دی70ویں سالگرہ شایان شان طریقے نال مناونڑ دا اعلان کریندے ہوئیں آکھیا جو وزیراعظم محمد نواز شریف دی ہدایت اُتے سارے ملک اچ قیام پاکستان دے 70سال پورے تھیونڑ اُتے سارا سال خصوصی تقریباں منایا ویسن ، ریڈیو پاکستان اُتے ایں بارے “اے ہفتہ(دس ویک)”دے ناں توں پروگرام وی شروع کیتا ویندا پئے جیندے اچ صحت ‘تعلیم ‘بنیادی ضروریات کیتے حکومتی اقدامات ‘زراعت ‘سی پیک ‘ایس ڈی جیز سمیت ہر حوالے نال آگاہی ڈتی ویسی ۔ ریڈیو پاکستان ہمیشہ پاکستان دے مثبت امیج کو ںاجاگر کیتے اتے مصدقہ ‘بروقت اتے سنسی دے بغیر اطلاعات انہاں علاقیاں دے لوکیں تئیں پجاون جتھاں تئیں حالی وی ٹی وی اتے اخبار تئیں کائنی پج سگدے ۔ او سنوار کوں ریڈیو دے عالمی ڈینھ دی مناسبت نال ریڈیو پاکستان اچ تھیونڑآلی خصوصی تقریب نال خطاب کریندی پئی ہن۔ وزیر مملکت آکھیا جو ریڈیو پاکستان اتے قیام پاکستان دا سفرہک ویلے شروع تھئے ، قیام پاکستان کوں جتھاں 70سال پورے تھیندے پئے ہن اتھاں ریڈیو پاکستان دے قیام دے وی 70سال پورے تھیندے پئے ہن ، قیام پاکستان دے نال نال ریڈیو پاکستان دے 70سال پورے تھیونڑ تے خصوصی تقریباں کیتیاں ویسن ۔ انہاں آکھیا جو پاکستان دی 70 ویں سالگرہ آندی پئی ہے جیکوں وزیراعظم نواز شریف تعمیری کردار ادا کرنڑآلیاں کوں خراج تحسین پیش کرنڑاں چاہندے ہن ۔ انہاں ہدایت کیتی جو آندے سال ریڈیو دا عالمی ڈینھ کہیں تعلیمی ادارے اچ تھیونڑاں چاہیدے جتھان نینگراں کوں ایںعمل اچ شامل کیتا ونج سگے ۔
