اسلام آباد ۔ 07 مارچ (اے پی پی) وفاقی وزیر دفاع خواجہ آصف آکھے جو افغان حکومت اعتراف کیتے جو افغان سرحد دے اندرتوں پاکستان دے خلاف کارروائیاں تھیندیاں پن جیہڑیاں جو اساڈے وس توں باہر ہن ۔ افغان حکومت دے نال تعلقات دی خواہش آپنڑیں جاہ جڈانجو دہشت گرداں کوں ہر جاہ تے منہ بھن جواب ڈیسوں ۔ منگل کوں پارلیمنٹ ہاوس دے باہر میڈیا نال گالھ مہاڑ کریندے ہوئیں انہا ں آکھیا جو افغان اساڈے بھرا ہن ، انہاں نال رشتے جڑے ہوئے ہن اتے انہاں دے نال تعلقات وی مثالی ہن ، حکومت انہاں دے نال مفاہمت دی پالیسی جاری رکھیسی ۔ انہاں آکھیا جو افغانستان ای سی او کانفرنس اچ رسمی شرکت کیتی ہے، ایں طرح دے عمل نال اے واضح تھیندے جو او بھارت دی کٹھ پتلی بنڑے ہوئے ہن ۔ انہاں آکھیا جو اساڈی مغربی سرحد وی غیرمحفوظ تھی گئی ہے جڈانجو مشرقی سرحد اُتے پہلے ہی بھارت بیٹھے، جڈانجو پاکستان آپنڑیں دفاع دی بھرپور صلاحیت رکھیندے ۔ جڈاں پاکستان وجود اچ آیا تاں افغانستان وڈی دیر نال پاکستان کوں تسلیم کیتا جڈانجو پاکستان 70 سالیں اچ افغانستان دے نال ہمیشہ تعاون کیتے ۔ وزیردفاع آکھیا جو پاکستان افغان جہاد اچ افغان مہاجراں دی مدد کیتی اتے لکھاں مہاجراں کوں ملک اچ پناہ ڈتی ۔ اساں افغانستان کیتے کڈاہئیں وی منفی رویہ کائنی رکھیا۔
