اسلام آباد7 مارچ (اے پی پی )وفاقی وزےر منصوبہ بندی ترقی واصلاحات احسن اقبال آکھیا جو اقتصادی راہداری دی سالانہ کانفرنس انفراسٹرکچر، توانائی، صنعت اتے معاشی زونز بارے معلومات دی آسان فراہمی اچ سنگ میل ثابت تھیسی ، کانفرنس نال دنیا دے سامنڑیں ابھردے ہوئے پاکستان دے مثبت اتے صحتمند نویوں رجحانات دا پیغام ڈتا ویسی ۔ اے گالہیں انہاں منگل کوں وزارت منصوبہ بندی اچ اقتصادی راہداری اُتے سالانہ کانفرنس بارے اہم اجلاس نال الیندے ہوئیں آکھیاں ۔اقتصادی راہداری بارے سالانہ کانفرنس ایں سال دے اخیر اچ کراونڑ دا فیصلہ کےتا گےا ،کانفرنس اچ پاکستان اتے چین نال کاروباری برادری کوں شرکت دی دعوت ڈتی ویسی ۔ ایں موقعے تے وفاقی وزےر وزارت دے اعلی حکام اتے اجلاس دے شرکاءکوں ہدایت کیتی جو سالانہ کانفرنس اچ نجی شعبے، تعلیم، تجارت، صنعت، ماہراں اتے محققین دی شرکت یقینی بنڑاونڑ کیتے ہونڑیں نال کوششاں شروع کیتیاں ونجن ۔ کانفرنس اچ پاکستان دے نجی، صنعتی اتے پیداواری شعبے کوں آپنڑیاں مصنوعات دی نمائش دی دعوت ڈتی ونجے ۔ انہاں آکھیا جو اقتصادی راہداری دی کانفرنس اچ شرکاءکوں اقتصادی راہداری دے مختلف منصوبیاں اُتے تھیونڑ آلی اگوہیں بارے ڈسایا ونجے ۔ اقتصادی راہداری نال دنیا دے سامنڑیں پاکستان دا نواں اتے بہوں ہی مثبت تصور سامنڑیں آیا ہے ۔
