صدر مملکت ممنون حسین دا نیشنل یونیورسٹی آف ماڈرن لینگویجز دے کانووکیشن توں خطاب

اسلام آباد ۔ 20 مارچ (اے پی پی) صدر مملکت ممنون حسین آکھیا ہے جو اقتصادی راہداری کوں کامیاب بنڑاونڑ دے ضمن اچ خطے دے ملکاں وچال سوکھے راطبے سانگے نویں لسانی تجربے دی ضرورت ہوسی جیںاچ اردو زبان بہترین بنیادفراہم کریندی ہے، ایں سلسلے اچ پاکستانی ماہرین لسانیات اتے نمل یونیورسٹی اپنڑاں کردار ادا کرے۔ اے گالھ انہاں نیشنل یونیورسٹی آف ماڈرن لینگویجزدے کانووکیشن توں خطاب کریندے ہوئیںآکھی ۔صدر مملکت آکھیا جو پاک چین اقتصادی راہداری کوں فعال بنڑاونڑ دے بعد پاکستان اچ غیر ملکی تاجراں، صنعت کاراں اتے مختلف شعبہ ہائے زندگی دے لوکاں دی وڈی تعداد اچ آمدو رفت دا سلسلہ شروع تھیا تاں زبان دے مسئلے سانجھے رابطے اچ رکاوٹ نہ بنڑ سگن ، ایں سوچ کوں سامنڑے رکھیندے ہوئیں ایوانِ صدر دے خرچے اچ گھٹکی کرتے نمل کوں ہک معقول رقم بطور عطیہ پیش کیتی ہئی تاں جوگوادر اچ ایں جامعہ دا کیمپس قائم کر کے اتھاں دے نینگراں کوں چینی زبان سکھائی ویسی ۔ صدر مملکت طالباں کوں مخاطب کریندے ہوئیں آکھیا جو انتہا پسندانہ طرز عمل دی گنجائش نہ اسلامی تعلیمات اچ ہے اتے نہ پاکستان دا آئین ایں دی اجازت ڈیندا ہے ، دین برحق اتے وطن عزیز دے دستور دی رو نال اعتدال دا رستہ چھوڑنڑ آلے پورے طور تے گمراہ اتے ناقابل معافی ہن ، ریاست اتے ریاستی ادارے انہاں ناپسندیدہ سرگرمیاں اتے انہاں ذمے واریاں دے سدباب سانگے چنگاں کردار ادا کریندے پے ہن لیکن ملک دے پڑھے لکھے طبقات، خاص طور تے نینگراں دی اے پہلی ذمے واری ہے جو او گمراہی تے مبنی بیان دی تردید اتے راست فکری تے مبنی جوابی بیانیے دے ودھارے سانگے ساریاں صلاحیتاں استعمال کرن انہاں آکھیا جو اج پاک چین اقتصادی راہداری دی صورت اچ علاقائی مواصلاتی رابطے دے جیں انقلاب دی توقع کر یندے پیوں، اینکوں یقینی بنڑاونڑ سانگے وی دہشت گردی تے انتہا پسندی نال نبڑنڑ ناگزیر ہے ۔ایں موقع تے صدر مملکت کامیاب طالب علماں اچ سنداں وی ونڈیاں ۔تقریب اچ ڈاکٹر مختار احمد، چیئرمین ہائر ایجوکیشن کمیشن، جنرل(ر) ضیاالدین نجم ، ریکٹر نیشنل یونیورسٹی آف ماڈرن لینگویجز، ماہرین تعلیم ،طالب علماںتے والدین دی وڈی تعداد شرکت کیتی۔