اسلام آباد ۔ 13 مارچ(اے پی پی)فنکاراں دی فلاح و بہبودسانگے وزیراعظم دی بنڑی خصوصی کمیٹی دا ڈوجھا اجلاس اج اسلام آباد اچ تھیسی جئیں اچ صوبائی سطح تے فنکاراں دا ڈیٹا بیس بنڑاونڑ سمیت مختلف تجویزاں تے غور تھیسی۔ مشیر وزیراعظم برائے قومی تاریخ تے ادبی ورثہ عرفان صدیقی دی سربراہی اچ بنڑی قائمہ کمیٹی دا اجلاس قومی تریخ تے ادبی ورثہ ڈویژن اچ تھیسی۔کمیٹی دا پہلا اجلاس 7مارچ کوں ایوان اقبال لاہور اچ تھیا ہئی۔وزیراعظم ولوں بنڑی ایں 12رکنی کمیٹی دے ڈوجھے اجلاس اچ ثقافت بارے چاریں صوبائی سیکرٹریاں توں انج پاکستان بیت المال دے منیجنگ ڈائریکٹر بیرسٹر عابد وحید شیخ، فلم سنسر بورڈ دے چیئرمین مبشر حسن، وزارت انفارمیشن ٹیکنالوجی تے ٹیلی کمیونیکیشن اتے نادرا دے حکام شریک تھیسن۔صوبائی سیکرٹریز آپنڑے آپنڑے صوبیاں اچ فنکاراں سانگے اجوکی سکیماں بارے اجلاس کوں ڈسیسن۔
