گوادر۔ 16 مارچ (اے پی پی) وزیراعظم محمد نواز شریف آکھیا جو ترقی دے سارے رستے بلوچستان توں نکلسن ،پاکستان ایشیاء دا ٹائیگر بنڑسی اتے بلوچستان پاکستان دا ٹائیگر بنڑسی،گوادر اچ چنگی یونیورسٹی اتے جدید ہسپتال بنڑایا ویسی،اتھاں دے عوام جوش تے خروش اچ امید دی وڈی کرن نظر امدی پئی اے ،حقیقی طور تے محسوس کریندے پئیوں جو گوادر سانگے مثالی ترقی دا دورہ شروع تھیندا پئے اتے ایں علاقے دی تقدیر بدلنڑ آلی اے۔خمیس کوں اتھاں عوامی جلسہ توں خطاب کریندیں ہوئیں وزیراعظم آکھیا جو کوئی ایجھا ڈینھ نی لنگھدا جئیں اچ گوادر دا ذکر نہ ہووے بلوچستان اچ سڑکاں دی تعمیر سانگے ارباں روپے خرچ تھیند ے پئن ۔ترقی پاروں دہشت گرد بھجدے پئن انہاں کوںبھجا کراہیں دم گھنسوں،بجلی دے منصوبے تے تکھے کم جاری اے ،جلدی اندھارے چھٹ ویسن۔گوادر دی زمین سونے چاندی توں ودھ قیمتی تھی گئی اے ،زمیناں دے اصل مالکاں کوں علاقے دی ترقی دا حصہ ملنڑاں چاہیدا اے۔انہاں آکھیا جو گوادر اچ جلدی جدید یونیورسٹی بنڑیسوں ایں سانگے موضع شابی اچ 500ایکڑ زمین گھدی گئی اے،ایں سانگے ہک ارب روپے خرچ تھیسن گوادر اچ جدید ہسپتال وی بنڑائے ویسن،غریب لوکاں کوں ہیلتھ کارڈز وی جاری کیتے ویسن اتے غریب لوکاں دا علاج معالجہ مفت کیتا ویسی۔گوادر دے 50نینگراں کوں چینی زبان سکھنڑ چین بھجیسوں اتے اتھاں دے 50نینگراں کوں ملک دی چنگی یونیورسٹی اچ داخلہ ڈتا ویسی،گوادر دی سڑکاں گلیاں تے سیوریج دے نظام دی بہتری سانگے ہک ارب روپے خرچ کیتے ویسن۔
