وزیراعظم محمد نواز شریف دی آپنڑیں کویتی ہم منصب نال ملاقات اتے وفود دی سطح اُتے مذاکرات اچ گالھ مہاڑ

کویت سٹی ۔ 07 مارچ (اے پی پی) وزیراعظم محمد نواز شریف کویت دے وزیراعظم شیخ جابر المبارک الحامد الصباح نال بایان پیلس اچ ملاقات کیتی اتے وفود دی سطح تے مذاکرات اچ شرکت کیتی۔ ایں موقعے تے وزیراعظم آکھیا جو ہک لکھ 14 ہزار توں ودھ پاکستانی کویت اچ راہندے پئے ہن ، جیہڑے جو ڈوہائیں ملکاں وچال مضبوط گانڈھے دا ثبوت ہے، ایندے نال پاکستان ولوں کویت دے نال تعلقات کو ں ڈتی ونجنڑ آلی اہمیت دا وی اندازہ تھیندے ۔ انہاں آکھیا جو پاکستان اتے کویت لمبے عرصے توں اقتصادی اتے تجارتی سانجھے دار ہن اتے پاکستان کویت دے نال سارے شعبیاں اچ آپنڑیں تعلقات کوں بیا ودھاونڑ دا خواہشمند ہے۔ وزیراعظم آکھے جو سانجھا وزارتی کمیشن معیشت دے مختلف شعبیاں اچ ڈوطرفہ تعاون دا جائزہ گھنڑ اتے ایں تعاون کوں اگوں ودھاونڑ کیتے نویں اہداف مقرر کرنڑدی بہوں چنگی جاہ ڈیندے ۔ ڈوہائیں ملکاں وچال ڈوطرفہ تجارت دی سطح بارے وزیراعظم ایں عزم دا اظہار کیتا جو ایں کوں مکمل صلاحیت دے مطابق بیا ودھاونڑ دی لوڑ ہے ۔ نجی شعبے دے آپسی رابطے دی حوصلہ افزائی نال تجارت کوں ودھاونڑ دے نال نال تجارتی توازن قائم کرنڑ اچ وی مدد ملسی ۔ وزیراعظم نواز شریف ایں موقعے تے ڈوہائیں ملکاں دی وڈی چیمبرز آف کامرس وچال پاکستان۔کویت سانجھی بزنس کونسل قائم کرنڑ دی تجویز ڈتی ۔ انہاں آکھیا جو ڈوہائیں ملکاں وچال زراعت، تعمیرات، پولٹری، لائیو سٹاک اتے فشریز دے شعبیاں اچ تعاون وی وڈی گنجائش موجود ہے۔ ایں بارے لائحہ عمل دی تیاری سانگے ڈوہائیں ملکاں وچال ماہراں دے اجلاس تھیونڑیں چاہیدے ہن ۔ وزیراعظم خلیج تعاون کونسل۔پاکستان آزادانہ تجارتی معاہدے بارے مذاکرات دی کویت دی معاونت توں تکھے بحالی دی اہمیت اتے ویزا پابندیاں کوں مکاونڑ دی لوڑ تے زرو ڈتا جیندے نال کاروباری برادری کیتے آزادانہ نقل و حرکت دی راہ اچ آونڑآلیاں وڈیاں رکاوٹاں مک ویسن ۔ انہاں آکھیا جو آپنڑیں آزادانہ سرمایہ کاری پالیسی اتے منافعے دی اعلیٰ شرح دے نال پاکستان ہک سرمایہ کاری دوست اتے غیر ملکی سرمایہ کاراں کیتے پرکشش ملک بنڑ گئے ۔ پاکستان اچ سرمایہ کاراں کیتے 100 فیصد سرمائے یا سانجھے منصوبے شروع کرنڑ دے موقعے ہن ۔ ایں ویلے ہک ہزار توں ودھ بہترین صلاحیت آلیاں ملٹی نیشنل کمپنیاں پاکستان دی معیشت دے مختلف شعبیاں اچ کامیابی نال کم کریندیاں پن ۔ محمد نواز شریف آکھیا جو پاکستان اچ توانائی اتے ڈھانچے دی ترقی دے ودھ سارے منصوبے ہن جنہاں دا غیر ملکی سرمایہ کار جائزہ گھن سگدے ہن ۔ اساں پاکستان دے ڈھانچے اتے توانائی دے وڈے منصوبیاں اچ کویت توں بئی سرمایہ کاری دا خیرمقدم کریسوں ۔ مذاکرات اچ وفاقی وزیر پٹرولیم و قدرتی وسائل شاہد خاقان عباسی، وزیراعظم دے معاون خصوصی برائے خارجہ امور طارق فاطمی اتے سرمایہ کاری بورڈ دے چیئرمین مفتاع اسماعیل وی موجود ہن ۔ کویت ولوں وزیراعظم، کویتی وزیر دفاع، وزیر خزانہ، وزیر توانائی اتے بئے اعلیٰ حکام وی مذاکرات اچ شریک ہن ۔ ایں توں پہلے بایان پیلس پجنڑ تے وزیراعظم محمد نواز شریف دا پرتپاک استقبال کیتا گیا۔