وزیر مملکت برائے اطلاعات نشریات و قومی ورثہ مریم اورنگزیب دا پائیدار ترقی دے اہداف بارے صحت اتے غذائیت دے چیلنجز اُتے ورکشاپ نال خطاب

اسلام آباد ۔ 06 مارچ (اے پی پی) وزیر مملکت برائے اطلاعات ، نشریات و قومی ورثہ مریم اورنگزیب آکھے جو پاکستان ترقی دے رستے اُتے ٹر پئے ، پائیدار ترقی دے اہداف دے حصول اچ وژن 2025ءدا اہم کردار ہے حکومت ملک اچ مردم شماری کراونڑ کیتے پرعزم ہے ‘ مردم شماری کراونڑ دا فیصلہ اہم سنگ میل ثابت تھیسی ، وزیراعظم دا ایجنڈا صرف پاکستان دے عوام اتے انہاں دی خوشحالی ہے‘او پاکستان اچ صرف پاکستان دے لوکیں کیتے کم کریندے پئے ہن ، پائیدار ترقی دے حصول کیتے سائنس و ٹیکنالوجی توں ودھ سارا فیدہ چاونڑاں ہوسی ، پاکستان دی پارلیمنٹ دنیا دی پہلی پارلیمنٹ اچ جتھاں پائیدار ترقی کیتے سیکرٹریٹ قائم تھئے ، پائیدار ترقی دے حصول اچ معاشرے دے ہر طبقے دی شمولیت ضروری ہے۔ اے گالہیں انہاں سنوار کوں پائیدار ترقی دے اہداف بارے صحت اتے غذائیت دے چیلنجز اُتے ورکشاپ نال خطاب کریندے ہوئیں آکھیاں۔ مریم اورنگزیب آکھے جو پاکستان اتے خطے دے ملکاں کوں پائیدار ترقی دے حصول اچ اوکھ دا سامنڑاں ہے ، 2013ءدے بعد پاکستان ترقی دی راہ اُتے ٹر پئے ۔انہاں آکھیا جو پائیدار ترقی کیتے عوامی سطح اُتے شعور اجاگر کرنڑ دی لوڑ ہے ، تعلیم ، صحت اتے بئے سارے شعبیاں کوں نال گھن تے ونجنڑاں ہے ۔ پائیدار ترقی دا حصول سارے اداریاں دی آپس دیاں کوششاں نال ہی ممکن ہے ۔ وزیراعظم اقوام متحدہ دی جنرل اسمبلی نال آپنڑیں خطاب اچ وی آکھیا ہئی جو تعلیم دے ودھارے کیتے پر ام معاشرہ لازمی ہے ۔ وزیر اطلاعات آکھیا جو وزیراعظم نواز شریف ملکی ترقی تے خصوصی توجہ ڈیندے پئے ہن ، سارےاں صوبائی اسمبلیاں پائیدار ترقی دے حوالے نال کم اُتے مبارخ دی مستحق ہن ، ارکان صوبائی اسمبلی دی شمولیت دے بغیر پائیدار ترقی دے اہداف حاصل کائنی تھی سگدے ، ملکی ترقی کیتے ہر صوبے کو ں آپنڑاں حصہ پاونڑاں چاہیدے ۔ وزیر اطلاعات آکھے جو پائیدار ترقی دے اہداف اچ عالمی تنظیماں کوں وی شامل کیتا ونجنڑاں چاہیدے ، ملک اچ نکاسی آب دے منصوبیاں کیتے یونیسیف نال معاہدہ کیتا ویندا پئے ۔ انہاں آکھیا جو ترقیاتی اہداف دے حصول اچ میڈیا دا کردار وی بہوں اہم ہے ۔