اسلام آباد ۔ 24 مارچ (اے پی پی) ملک اچ جاری چھیویں قومی خانہ و مردم شماری اُتے اگوہیں دا جائزہ گھنڑ کیتے ہک اعلیٰ سطحی اجلاس وفاقی وزیر خزانہ سینیٹر اسحاق ڈار دی صدارت اچ تھیا۔ اجلاس اچ وفاقی وزیر قنون زاہد حامد، وزیراعظم دے معاون خصوصی برائے قنون بیرسٹر ظفر اﷲ خان، وزیراعظم دے معاون خصوصی برائے شماریات خواجہ ظہیر احمد، سیکرٹری خزانہ اتے سیکرٹری شماریات ڈویژن وی شرکت کیتی۔ ایںموقعے تے چیف شماریات اجلاس کوں ڈسایا جو مردم شماری دے پہلے مرحلے دیاں سرگرمیاں ست ڈینھ توں جاری ہن ۔ سارے ملک دے 40 ہزار بلاکس اچ شماریاتی کم ہر ویلے جاری ہے ۔ پہلے مرحلے دے تحت بہوں سارا کم وی پورا کر گھدا گئے اتے سارے ساریاں شماریاتی سرگرمیاں رائج طریقہ کار دے مطابق مکمل کیتیاںویسن۔ وفاقی وزیر خزانہ مردم شماری دے کم اچ روجھے فوجی عملہ سمیت ساریاں اہلکاراں دی لگن دی تعریف کیتی اتے ہنڑ تئیں دی اگوہیں اُتے تسلی ظاہر کیتی ۔ انہاں آکھیا جو ملک اچ 19 سال دے بعد ایں قومی ذمہ داری کوں پورا کرنڑ دا سہرا پاکستان مسلم لیگ (ن) دی حکومت دے سر ویندے ، اے سارا عمل شفاف انداز اچ عالمی سطح اُتے رائج بہترین طریقیاں دے مطابق پورا کیتا ویسی ۔
