اسلام آباد ۔ 06 مارچ (اے پی پی) وفاقی وزیر خزانہ سینیٹر اسحاق ڈار آکھے جو فوجی عدالتاں دی توسیع اُتے اتفاق رائے موجود ہے، نہ پہلے کلھے فیصلہ کیتا ہئی نہ ہنڑ کریسوں ، ساریاں دی صلاح شامل ہوسی ، دہشت گردی دے مکمل خاتمے کیتے ساری قوم ہک مٹھ ہے ۔ اے گالہیں انہاں سنوار کوں وفاقی وزیر زاہد حامد دے نال پارلیمنٹ ہاﺅس دے باہر میڈیا نال گالھ مہاڑ کریندے ہوئیں آکھیاں ۔ انہاں آکھیا جو فوجی عدالتاں دے معاملے اُتے ساریاں سیاسی جماعتاں نال کھلے دل نال صلاح کریسوں ، انہاں آکھیا جو فیصلے اتفاق رائے نال کرنڑ دی کوشش کریسوں ، اج دا قومی اسمبلی دا اجلاس سیاسی جماعتاں دی صلاح دے بعد سڈیا گیا، ایندے کیتے ساریاں سیاسی جماعتاں آکھیا ہئی جو قومی اسمبلی دا اجلاس فوری سڈیا ونجے ۔ وفاقی وزیر آکھیا جو دہشت گردی دے مکمل خاتمے کیتے ساری قوم ہک مٹھ ہے اتے اساں ہک مٹھ تھی تے ایندا خاتمہ کریسوں ۔انہاں آکھیا جو پیپلز پارٹی 4 مارچ کوں اے پی سی سڈی ہئی ، پی پی پی فوجی عدالتاں اچ ہک سال دی توسیع دی تجویز ڈتی ہے ۔ وفاقی وزیر آکھیا جو نیشنل ایکشن پلان اُتے 20 مختلف شعبیاں اچ بہوں حد تئیں اگوہیں تھئی ہے ۔ فوجی عدالتاں دے معاملے اُتے آندے ڈوڈینھ اچ اجلاس سڈیسوں ۔
