اسلام آباد ۔ 29 مارچ (اے پی پی)وفاقی کابینہ دی حتمی منظوری دے بعد نیکسٹ جنریشن موبائل سپکٹرم نیلامی 2014تے 2016اچ بقایا بچ ونجنڑ آلے سپکٹرم دی ازسرنو نیلامی، وزارت انفارمیشن ٹیکنالوجی اینڈ ٹیلی کام پی ٹی اے کوں پالیسی ہدایات جاری کر ڈتیاں۔ایں پالیسی ہدایات دی رو نال پی ٹی اے کوں اجوکے مالی سال اچ 1800میگاہرٹز اتے 10میگا ہرٹز دا ہک بینڈ شفاف نیلامی دے ذریعے وکامت کرنڑ دا عندیہ ڈے ڈتاگیا ہے ۔بدھ کوں جاری بیاندے مطابق موبائل براڈ بینڈ دی کھپت اتے ایندی منگ اچ روز افزاں ودھارے دے سبب فریکوئنسی سپکٹرم دی ڈیمانڈ اچ ودھارا تھی گیا ہے ۔2014اتے 2016اچ تھری تے فور جی سپکٹرم دی کامیاب نیلابی دے بعد موبائل براڈ بینڈ دی شرح نمو جیرھی جو ایندے توں پہلے ترائے فیصد توں گھٹ ہئی ،ہنڑ27فیصد توں وی ودھ گی ہے ۔ایں صورتحال دے پیش نظر وزیراعظم دے حکم تے وزیر مملکت انفارمیشن ٹیکنالوجی انوشہ رحمان دی صدارت اچ ہک ایڈوائزری کمیٹی تشکیل ڈتی گی تاں جو مارکیٹ اچ سپکٹرم دی ودھدی ہوئی منگ دا تجزیہ کرتے ایندا حل تجویز کیا ونجے ۔ بعداچ ایڈوائز ی کمیٹی بہوں مشاورتی اجلاس منعقد کیتے گے سپکٹرم دی دستیابی دے حوالے نال مختلف پہلواں تے غور کیتا گیا ، آخری اجلاس اچ حتمی سفارشات مرتب کر تے منظوری وفاقی کابینہ کوں بھجوائیاں گیاں ۔ کابینہ ولوں حتمی منظوری موصول تھیونڑ دے بعد وزارت انفارمیشن ٹیکنالوجی اتے ٹیلی کام پی ٹی اے کوں پالیسی ڈائریکٹو نیلامی سپکٹرم 1800 میگا ہرٹز 10 میگا ہرٹزجاری کر ڈتا ہے۔
