”را ” بلوچستان اتے کراچی اچ امن دی بحالی دیاں کوششاں کوں سبو تاژ کرنڑ دی ذمہ داری ڈتی ہئی ، گرفتار بھارتی نیول کمانڈردا اعتراف
راولپنڈی ۔ 10 اپریل (اے پی پی) پاک فوج دے فیلڈ جنرل کورٹ مارشل بھارتی جاسوس کلبھوشن یادیو کوں سزائے موت سنڑا ڈتی ہے،آرمی چیف جنرل قمر جاوید باجوہ فیصلے دی توثیق کر ڈتی ‘کلھبوشن یادیو پاکستان اچ تخریبی کارروائیاں اچ ملوث ہئی ایں من گھدا ہا جو اینکوں بھارتی خفیہ ایجنسی را پاکستان بھجوایاہئی۔پاک فوج دے شعبہ تعلقات عامہ(آئی ایس پی آر) دے ڈائریکٹر جنرل،میجر جنرل آصف غفور دے ٹویٹ دے مطابق بھارتی خفیہ ایجنسی را داایجنٹ ‘بھارتی بحریہ دے افیسر نمبر 41558Z کمانڈر کلبھوشن یادیو المعروف حسین مبارک پٹیل کوں 3مارچ 2016ء کو ںپاکستان مخالف سرگرمیاں اچ ملوث تھیونڑ تے بلوچستان دے علاقے ماشکیل اچ انٹیلی جنس اپریشن دے دوران گرفتار کیتا گیا ہئی ۔پاک فوج دے فیلڈ جنرل کورٹ مارشل پاکستان آرمی دے ایکٹ (پی اے اے ) دے تحت کلبھوشن یادیو کوں پھاسی دی سزا سنڑائی گی ہے ۔سنوار کوں آرمی چیف جنرل قمر جاوید باجوہ کلبھوشن یادیو کو ںفیلڈ جنرل کورٹ مارشل ولوں ڈتی گی سزائے موت دے فیصلے دی توثیق کر ڈتی ۔بھارتی خفیہ ایجنسی را دے ایجنٹ نیول کمانڈر کلبھوشن یادیو دے خلاف فیلڈ جنرل کورٹ مارشل پاکستان آرمی دے ایکٹ (پی اے اے ) 1952دے سیکشن 59اتے آفیشل سیکرٹ ایکٹ آف 1923دے سیکشن ترائے دے تحت کاروائی عمل اچ لاتی گی ہے ۔فیلڈ جنرل کورٹ مارشل کلبھوشن سدھیر یادیو کوں سارے الزاماں اچ قصور وار پاتا ۔کلبھوشن یادیو مجسٹریٹ اتے عدالت دے سامنڑے من گھدا ہئی جو اینکوں را ولوں اے ذمے واری ڈتی گی ہئی جو او جاسوسی’ تخریبی کارروائیاں سانگے منصوبہ بندی اتے رابطے کوں منظم کرے تا ں جو پاکستان دے قنون نافذ کرنڑ آلے اداریں ولوں بلوچستان اتے کراچی اچ امن دی بحالی دیاں کوششاں کوں سبو تاژ کیتا ونج سگے ۔بھارتی جاسوس کلبھوشن یادیو کوںقانون دے مطابق اپنڑے دفاع سانگے قنونی ماہر افیسردیاں خدمات فراہم کیتیاں گیاں ہن ۔
