اسلام آباد ۔ 24 اپریل (اے پی پی) وزیر مملکت کیڈ طارق فضل چوہدری آکھیا ہے جو پاناما پیپر کیس جے ٹی آئی دی تحقیقات دے بعد پورے طور تے بند تھی ویسی ۔ نجی ٹیلی ویژن نال گالھ مہاڑ کریندے ہوئیں انہاں آکھیا جو سپریم کورٹ ولوں پاناما پیپرز کیس تے فیصلہ وزیراعظم نواز شریف دے حق اچ ہے اتے جوائنٹ انوسٹیگیشن ٹیم (جے آئی ٹی )دی تحقیقات دے بعد کیس پورے طور تے بند تھی ویسی ۔طارق فضل چوہدری آکھیا جو مسلم لیگ ن پاکستان دی مقبول جماعت ہے ایں گالھ دا واضح ثبوت اے ہے جو ہنڑے ہیں تلہ گنگ اچ تھیونڑ آلے ضمنی انتخابات اچ مسلم لیگ ن دے امیدوار کوںووٹ ڈے تے واضح کامیابی ڈیوائی ہے ۔ہک سوال دے جواب اچ انہاں آکھیا جو گزریل دور اچ پیپلز پارٹی تے وی کرپشن دے مقدمے قائم کیتے گے انہاں اچ کوئی وی کیس مسلم لیگ ن ولوں درج کائنی کرایا گیا ۔پاناما پیپرز فیصلے دے حوالے نال انھاں تعجب دا اظہار کریندے ہوئیں آکھیا جو سپریم کورٹ ولوںپاناما پیپرز دے فیصلے کوں پی ٹی آئی پہلے ڈینھ قبول کیتا جڈاں جو ڈوجھے ڈینھ احتجاج کرنڑ شروع کر ڈتا ۔وزیر مملکت کیڈ آکھیا جووزیر اعظم محمد نواز شریف توں استعفے گھننڑ دی تحریک انصاف دی خواہش کڈاہیں وی پوری کائناں تھیسی
