صدر مملکت ممنون حسین دی ازبکستان سانگے نامزد سفیر ڈاکٹر عرفان یوسف شامی نال ملاقات اچ گالھ مہاڑ

ازبکستان وسط ایشیا دا اہم ترین ملک ہے ، پاکستان ازبکستان دے نال تعلقات کو ں وڈی قدر دی نگاہ نال ڈیکھدا ہے
اسلام آباد ۔ 26 اپریل (اے پی پی) صدر مملکت ممنون حسین آکھیا ہے جو ازبکستان وسط ایشیا دا اہم ترین ملک ہے اتے پاکستان ازبکستان دے نال تعلقات کوں بہوں قدر دی نگاہ نال ڈیکھدا ہے ۔ اے گالھ انہاں بدھ کوں ایوان صدر اچ ازبکستان سانگے نامز د سفیر ڈاکٹر عرفان شامی نال گالھ مہاڑ کریندے ہوئیں کیتی ۔صدر مملکت ڈاکٹر عرفان یوسف شامی کوں ازبکستان اچ سفیر تعینات تھیونڑ تے مبارخ ڈیندے ہوئیں آکھیا جو ڈوہیں ملکاں وچال ڈو پاسے تعلقات کوں ودھارا ڈیونڑ دی ضرورت ہے ایں سانگے ضروری ہے جو تجارتی حجم اچ ودھارا کیتا ونجے ۔انہاں آکھیا جو ڈوہیں ملکاں وچال زمینی رستے تے گیس پائپ لائن دی تکمیل تے توجہ ڈتی ونجے تاں جو پاکستان اچ توانائی دا مسئلہ وختی حل تھی سگے ۔۔ صدر مملکت نامزد سفیر کوں ہدایت کیتی جو زراعت ٹرانسپورٹ دے شعبے اچ ازبکستان توں فائدہ چاونڑ سنگے لائحہ عمل بنڑایا ونجے ۔صدر مملکت نامزد سفیر نال گالھ مہاڑ کریندے ہوئیں آکھیا جو پاکستان دی مصنوعات کوں چنگے طور تے پیش کرنڑ سانگے ازبکستان اچ ڈسپلے سینٹر بنڑائے ویسن تاں جو بر آمدات اچ ودھارا تھی سگے ۔