اسلام آباد ۔ 02 اپریل (اے پی پی)محکمہ موسمیات اج( سنوار توں ) سارے ملک اچ بارشاں دے نویں سلسلے دے شروع تھیونڑ دی پیشنگوئی کیتی ہے ۔ محکمہ موسمیات دے ترجمان دے مطابق ہوائیں دی آمد نال ملک دے اُتلے اتے وچلے حصیاں اچ سنوار توں خمیس تئیں بارشاں دا نواں سلسلہ شروع تھیسی ۔ انہاں آکھیا جو ایں دوران خیبر پختونخوا ، فاٹا ، گلگت بلتستان اتے کشمیر دےاں کجھ جاہیں اُتے اندھاری دے آونڑ اتے گرج چمک نال بارش دا امکان ہے ۔ ترجمان آکھے جو مالا کنڈ ، ہزارہ ڈویژن اتے کشمیر اچ منگل اتے بدھ کوں شدید بارش تھیسی جڈانجو راولپنڈی ، سرگودھا ، گجرانوالہ ، لاہور اتے فیصل آباد ڈویژن اتے اسلام آباد اچ وی کجھ جاہیں اُتے گرج چمک دے نال بارش دا امکان ہے ۔ انہاں آکھیاجو اُتلے پنجاب ، اُتلے خیبر پختونخوا اتے کشمیر اچ کتھائیں کتھائیں نناواں پوونڑ دی توقع ہے ۔
