مذہبی ہم آہنگی دے ودھارے ، بنیادی انسانی حقوق سانگے جامع قانون سازی اتے ایندے تے عمل در آمد نال بین الاقوامی سطح تے پاکستان دا امیج چنگاں تھیا ہے ،وفاقی وزیر انسانی حقوق

اسلام آباد ۔ 13 اپریل (اے پی پی) وفاقی وزیر انسانی حقوق سینیٹر کامران مائیکل آکھیا ہے جو موجودہ حکومت وزیراعظم محمدنواز شریف دے وژن دے مطابق ترجیحی بنیاداں تے مذہبی ہم آہنگی دے ودھارے سمیت بئے بنیادی انسانی حقوق اتے بالخصوص تریمتاں ،بالاں اتے اقلیتاں دے تحفظ سانگے جامع قانون سازی کیتی ہے اتے ایں تے عمل درآمد کیتا ویندا پیا ہے جیں تے بین الاقوامی سطح تے پاکستان دا امیج چنگاں تھیا ہے ۔ خمیس کوں ہک بیان اچ وفاقی وزیر آکھیا جو آئین پاکستان ملک اچ وسنڑ آلے سارے شہریاں کوں بلا تفریق سارے حقوق دی ضمانت ڈیندا ہے ایں سلسلے اچ وزارت انسانی حقوق ،تریمتاں تے بالاں اتے اقلیتاں دے حقوق دی ویلھے نال فراہمی سانگے قنون سازی کریندی پئی ہے اتے ایں ضمن اچ سارے صوبین کوں نال گھن تے مطلوبہ اہداف کوں ویلھے نال پورا کرنڑ سانگے کم تھیندا پیا ہے ۔انہاں آکھیا جو پاکستان اچ بنیادی انسانی حقوق دے تحفظ اتے خاص کر تریمتاں بالاں اتے اقلیتاں دے تحفظ سانگے اقدامات کیتے گے ہن ایں ضمن اچ مزید قنون سازی کیتی پئی ہے ۔