جیکب آباد ۔ 14 اپریل (اے پی پی) وزیراعظم محمد نواز شریف’ جیکب آباددی عوام دی فلاح و بہبود سانگے 100کروڑروپے دے ترقیاتی فنڈز،تریمتیں سانگے جدید ووکیشنل سنٹر،دیہاتاں سانگے بجلی تے گیس ،پاسکو سینٹر اتے قومی صحت کارڈ دے اجراء سمیت کئی منصوبیاں تے پیکیج دا اعلان کریندیں ہوئیں آکھیا جو ویلھا بدل گئے ،حالات بدلسن،ہنڑ صرف نعریاں تے ووٹ کائنا ملسی،کچھ کرنڑ نال ووٹ ملسی،جیڑھی ترقی اسلام آباد پنجاب اتے بلوچستان اچ تھیندی پئی اے او سندھ اتے کے پی کے اچ وی تھیونڑی چاہیدی اے۔اے گالھیں انہاں جمعہ کوں اتھاں ہک وڈے عوامی کٹھ نال خطاب کریندیں ہوئیں آکھی۔تقریب اچ وفاقی وزیر ریلوے خواجہ سعد رفیق، وزیراعظم دے معاون خصوصی برائے سیاسی امور ڈاکٹر آصف کرمانی، سابق سپیکر قومی اسمبلی الہی بخش سومرو، سینیٹر راحیلہ مگسی، صدر پاکستان مسلم لیگ(ن) سندھ بابو سرفراز، مسلم لیگ (ن) دے مقامی رہنمااسلم ابڑو اتے سجاد علی وی موجود ہن ۔وزیراعظم آکھیا جو میڈی نظر اچ پاکستان اچ ساریاں توں ودھ مستحق لوک جیکب آباد دے لوک ہن ،اگر پاکستان اچ کہیں ترقی یافتہ ضلع یافتہ ضلع یا شہر کوں 100کروڑ روپے ڈتے ونجنڑے چاہیدن تاں جیکب آباد کوں 200کروڑ روپے ڈتے ونجنڑے چاہیدن۔اگر اسلام آباد کوں 200کروڑ روپے ڈتا ونجنڑاں چاہیدے تاں جیکب آباد کوں 400کروڑ ڈتے ونجنڑے چاہیدن۔اے انہاں دا حق اے۔جیکب آباد دے رہنڑ آلے وی اتنے ای باعزت،خوشحال ہوونڑے چاہیدن جتنا اسلام آباد،لاہور،کراچی اتے کوئٹہ دا رہنڑ آلا اے۔وزیراعظم آکھیا جو ڈاڈھی گرمی پاروں وڈی تعداد اچ لوکاں دے عوامی اجتماع اچ شرکت کوں سراہندیں ہوئیں آکھیا جو خصوصی طور تریمتیں دی وڈی تعداد دی شرکت قابل تحسین اے۔
