اسلام آباد ۔ 24 اپریل (اے پی پی) وفاقی وزیر انسانی حقوق سینیٹر کامران مائیکل آکھیا ہے جو وزیراعظم محمد نوا شریف دی قیادت اچ موجودہ حکومت سارے اقلیتی برادریاں دے حقوق دی رسائی کوں مزید سوکھا بنڑاونڑ سانگے نویں دور دی ضرورت دے مطابق مطلوبہ قنون سازی کریندی پئی ہے ۔سنوار کوں ہک بیان اچ وفاقی وزیر آکھیا جو حکومت پاکستان ساریاں اقلیتی برادری خصوصی طور تے عورتاں تے بال دے بنیادی حقوق دی فراہمی سانگے مسلسل کوشاں ہے ،ایں سلسلے اچ انسانی حقوق دی ویلھے نال فراہمی سانگے ضلعی سطح تے مختلف کمیٹیاں بنڑایاں گیاں ہن ۔انہاں آکھیا جو اساں چائلڈ لیبر تے جبری شادی دی روک تھام سانگے قنون سازی کریندے پیوں ۔انہاں آکھیا جو اقلیتی مفادات اتے جائز حقوق دا تحفظ کرنڑاں آئینی ذمے واری ہے تے بال تے ماء،خاندان اتے شادی دا تحفظ ایندی ذمے واری اچ شامل ہے ۔انہاں آکھیا جو ہندوواں دی شادی دی رجسٹریشن کوں ریگولیٹ کرنڑ دا کوئی وی قنون موجود کائناں ہئی ۔موجودہ حکومت ہندواں دی شادی کوں ریگولیٹ کرنڑ سانگے تاریخی ہندو میرج بل منظورکیتا ۔
