وزیر دفاع خواجہ محمد آصف دا قومی اسمبلی اچ تحریک التواتے اظہار خیال

سعودی عرب دی قیادت اچ اسلامی فوجی اتحاد دی سربراہی سانگے جنرل (ر) راحیل شریف دی ریاست دی سطح تے منظوری تھی گی ہے ، فوجی اتحاد باضابطہ طور تے کم شروع کریسی تاں او این او سی سانگے اپلائی کریسن ‘ وزارت دفاع انہاں کوں این او سی جاری کریسی

اسلام آباد ۔13 اپریل(اے پی پی) وزیر دفاع خواجہ محمد آصف آکھیا ہے جو سعودی عرب دی قیادت اچ اسلامی فوجی اتحاد دی سربراہی سانگے جنرل (ر) راحیل شریف دی ریاست دی سطح تے منظوری تھی گی ہے تاں جو اے فوجی اتحاد باضابطہ طور تے کم شرو کریسی تاں او این او سی سانگے اپلائی کریسن قنون دے مطابق انہاں کوں وزارت دفاع این او سی جاری کریسی ۔خمیس کوں قومی اسمبلی اچ ڈاکٹر شیریں مزاری دی سعودی عرب دی قیادت اچ فوجی اتحاد اچ پاکستان دی شمولیت دے حوالے نال تحریک التوا تے اظہار خیال کریندے ہوئین خواجہ محمد آصف آکھیا جو 41 ملکاں دی انڈر سٹینڈنگ ہے جو سعودی عرب دی قیات اچ فوجی اتحاد بنڑایا ونجے ،ایں حوالے نال چھی مہینے پہلے ہک اجلاس تھیا ہئی جیں اچ وزیراعظم نواز شریف جنرل (ر) راحیل شریف شرکت کیتی۔ ایں اتحاد دا مقصد دہشتگردی دا خاتمہ ہے، آندے مہینے ایں اتحاد دے مقاصد واضح تھی ویسن ۔انہاں آکھیا جو ایں اتحاد دے خدوخال اتے مقاص جڈاں وی واضح تھیندے ہن تاں ایوان کوں ڈسا ڈیسوں ۔ جنرل (ر) راحیل شریف دی تعیناتی دے معاملے تے سعودی عرب درخواست کیتی جو پاکستان دے سابق سپہ سالار ایندی قیادت کرن ،ریاست دی سطح تے اصولی منظوری تھی گی ہے ۔اتحاد دی تشکیل دی رسمی کاروائی تھی ویسی تاں جنرل (ر ) راحیل شریف این او سی سانگے اپلائی کریسن اتے وزارت دفاع قنون دے مطابق این او سی جاری کریسی ۔انہاں آکھیا جو پارلیمنٹ دے سانجھے اجلاس اچ منظور کیتی گی قرارداد دا کئی واری حوالہ ڈتا گیا ایندی ضرورپابندی کیتی ونجے ۔اگر اساں اتحاد دا حصہ بنڑ دوں تاں کہیں وی ایجھے جھیڑے اچ کائناں ویسوں جیرھا جو ڈو اسلامی ملکاں وچال ہوسی ۔ایں اتحاد دے کہیں وی ملک دے خلاف مذموم مقاصد کائنی ۔جیویں یمن دے حوالے نال ایں پارلیمنٹ رہنمائی کیتی ہئی ایں معاملے تے وی پارلیمنٹ کوں اعتماد اچ گھنسوں انہاں آکھیا جو حرمین شریفین نال وابستگی اتے سعودی عرب دے نال برادرانہ تعلقات ایندی سیکورٹی کوں یقینی بنڑیسن ۔