اسلام آباد ۔ 28 مئی (اے پی پی) وزیر اعظم محمد نواز شریف رمضان المبارک دے شروع تے سارے اہل اسلام کوںمبارخ ڈیندے ہوئیں سارے ہم وطناں توں درخواست کیتی ہے جو او آپنڑیں اندر اتحاد تے اتفاق، برداشت، رواداری، خیرخواہی اتے احترام انسانیت دے جذبے اُتے مبنی اعلیٰ صفات پیدا کرن کیونجو اے او تعلیمات نبویۖ ہن جنہاں کوں اپناتے ہر طرح دی منفی سوچ رکھنڑآلیاں طاقتاں دا مقابلہ کیتا ونج سگدے ۔ روزہ صرف بُکھ اتے تس دا ناں کائنی جڈانجو اے تزکیہ نفس دا ناں ہے ، ماہ مبارک اچ اساکوں آپنڑیں آسے پاسے اردگرد موجود بے سہارا، غریب اتے مستحق افراد دی مدد دا وی خصوصی اہتمام کرنڑاں چاہیدے ۔ وزیراعظم اے گالہیں رمضان المبارک دے شروع تھیونڑ تے قوم دے ناں آپ دے سنیہے اچ آکھیاں ہن ۔ وزیراعظم آکھیا جو او رمضان المبارک دی آمد اُتے سارے اہل اسلام کو ں دل دیاں گہرائیاں توں مبارخ ڈینداں ۔ اے اللہ تعالیٰ دا فضل وکرم ہے جو اوں اساکوں ہک واری ولا ایں ماہ مبارک دے فیوض تے برکات توں فیدہ چاونڑ دا موقع ڈتے ۔ میڈی دعا ہے جو اساں ساریاں دی زندگی اچ ایں طرح دے مبارک موقعے ولا ولا آندے راہون ۔ وزیراعظم آکھیا جو روزہ عبادت وی ہے اتے ایندے نال طرز زندگی وی جتھاں ایندا مقصد تقویٰ پیدا کرنڑاں ہے اتھاں اے انسان دی زندگی اچ نظم وضبط وی گھن آندے ۔ اللہ دا بندہ اوندے حکم دی اطاعت کریندے ہوئیں آپ کوں ہر اوں کم توں روکیندے جئیں کوں عام ڈینھ اچ کرنڑ دی اجازت ہوندی ہے ۔