لاہور۔7 مئی (اے پی پی ) حکومت جنوبی پنجاب اچ ہر طرح دیاں سہولتاں ڈیونڑ کوںآپنڑیں اولین تر جیحات اچ شامل کیتے ہوئے ہے ۔ ایں بنیا دتے بہاولپور اتے ملتان اچ انتقال خون مرکزاں دے قیام بارے جرمنی دی حکومت نال معاہدہ کیتا گیا ہئی، انہاں مرکزاں دے قیام تے 32 کروڑ روپے لاگت آئی ،ہک معاہدے دے تحت انہاں مرکزاں کوں رجب طیب اردوان ہسپتال ٹرسٹ اتے انڈس ہسپتال دے حوالے کر ڈتا گئے ۔ انتقال خون مرکزاں بہاولپور اتے ملتان دے نال چھی چھی ہسپتال جوڑے ویسن ، اتے انہاں مرکزاں دے شروع تھیونڑ نال لوکیں کوں خون دی سکریننگ دیاں بہوں چنگیاں سہولتاں ملسن ، اتے مریضاں کوںصحت مند خون مل سگسی ۔ اے گالہیں صوبائی وزیر کو آپریٹو ملک محمد اقبال چنڑ آپنڑیں رہائش گاہ تے مسلم لیگی ورکراں نال ملاقات اچ آکھیاں ۔ انہاں ڈسایا جو پنجاب حکومت 60 بستریاں دے ہسپتال کوں 120 بستریاں تئیں ودھا ڈتے ، اتے ہنڑ ایں ہسپتال اچ پنجاب حکومت آپنڑیں وسائل نال 250 بستریاں دا بیا ودھارا کریندی پئی ہے ۔ ملتان اچ 150 بستریاں اُتے مشتمل کڈنی سنٹر مکمل تھی گئے اتے ایں سال جون اچ کڈنی سنٹر کوں ایندی انتظامیہ دے حوالے کرڈ تا ویسی ۔
