اسلام آباد ۔پہلی مئی (اے پی پی) سپیکر قومی اسمبلی سردار ایاز صادق آکھے جو حکومت مزدور اں دی عزت اتے وقار کوںتحفظ ڈیسی ، کہیں وی قوم دی اقتصادی طاقت اتے قوت دا اندازہ اتھاں دے محنت کش طبقے دی حیثیت اتے معیار زندگی اتے انہاں دے حقوق دے تحفظ توں لایا ونج سگدے ۔ مزدوراں دے عالمی ڈینھ دے موقعے تے آپنڑیں ہک سنیہے اچ سردار ایاز صاد ق آکھیا جو محنت کش طبقہ کہیں وی ملک دی ترقی اتے خوشحالی اچ بنیادی کردار ادا کریندے ۔ ایں سانگے اساں اُتے لازم ہے جو انہاں دی فلاح و بہبود اتے انہاں دیاں خدمات دے معاوضے دی ویلے تے ادائیگی کوں یقینی بنڑایا ونجے ۔ سپیکر آکھیا جو اسلام محنت کشاں دی فلاح و بہبود اتے مناسب معاوضے دی ادائیگی اُتے ودھ سارا زور ڈیندے ۔ انہاں آکھیا جو دنیا دے سارے مہذب معاشریاں آپنڑیں محنت کش طبقے دے حقوق اتے فلاح و بہبود کوں یقینی بنڑاونڑ کیتے قنون سازی کیتی ہوئی ہے ۔ انہاں آکھیا جوا ساں ایں عزم دے نال یوم مئی کوں منیندے پئے ہئیں جو اساں مزدوراں دی عزت اتے وقار کوںتحفظ ڈے سگوں ، اتے اج دے ڈینھ شکاگو اچ پیش آونڑ آلے تریخی واقعے اچ انہاں مز دوراں کوں خراج تحسین پیش کریندے ہئیں جنہاں آپنڑیں بہادری اتے استقلال دے ذریعے ساری دنیا دے مزدوراں کوں انہاں دے بنیادی حقوق دی فراہمی کیتے آواز چاتی ۔ سپیکر آکھیا جو پاکستان دی معا شی ترقی اچ اساڈے مزدور قابل فخر خدمات سر انجام ڈیندے پن ۔ باہرلے ملکاں اچ کم کرنڑ آلے پاکستانی نہ صرف پاکستان دی شناخت ہن جڈانجو ا و قیمتی زرمبادبھیج تے ملک دی تعمیر و تر قی اچ اہم کردار ادا کریندے پن ۔ انھاں آکھیا جو موجود ہ جمہوری حکومت مزدوراں دی ترقی اتے خوشحالی کیتے مزدور دوست پالیسیاں جاری کریندی پئی ہے ۔ انہاں آکھیا جو افرادی قوت کہیں وی ملک دی سماجی تے اقتصادی تر قی اچ ریڑھ دی ہڈی دی حیثیت رکھیندی ہے ۔ انہاں آکھیا جو ملک اچ موجودہ جمہوری حکومت مزدوربرادری اتے انہاں دے ٹبراں دی فلاح وبہبود کیتے تر جیحی بنیاداں تے اقدامات کریندی پئی ہے ۔ انہاں مزدور طبقے دے حقوق دے تحفظ اتے انہاں کوں چنگے معیار زندگی دی فراہمی دے حکومتی عزم کوں وی دہرایا۔
