مسلمان دی حیثیت نال اساکوں سار ی دنیا دا امن عزیز ہے ،اساں عالمِ انسانیت دی ترقی ، خوش حالی اتے فلاح و بہبود چاہندے ہئیں ،
اسلام آباد ۔ 26 مئی (اے پی پی) صدر مملکت ممنون حسین آکھے جو مسلمان دی حیثیت نال اساکوں ساری دنیا دا امن عزیز ہے اتے اساں عالمِ انسانیت دی ترقی ، خوش حالی اتے فلاح و بہبود چاہندے ہئیں ۔ اساڈا اے عقیدہ ہے جیندے اُتے عمل کریندے ہوئیں امنِ عالم کیتے پاکستان ہمیشہ پرُجوش کردار ادا کیتے ۔ اساڈا اے کردار اگوں تے وی جاری راہسی ۔ او جمعے کوں اتھاں ”میثاقِ مدینہ“ دی روشنی اچ معاشرے دی تشکیل دے موضوع اُتے سیمینار نال خطاب کریندے پئے ہن ۔ صدر مملکت آکھیا جو پاکستان اتے اے خطہ گزریل تقریباً چار ڈھاکیاں توں ہک ایں طرح دی کش مکش دا شکار ہے جیندے اچ خون وہاوی بہوں تھئے اتے اساڈے معاشرتی ڈھانچے کوں وی بہوں سارا نقصان تھئے ۔ اے ہک ناقابلِ تردید حقیقت ہے جو ایں خون وہا اتے انہاں جنگاں دے اسباب غیر مقامی ہن جڈانجو باہرے فیدے دے گورکھ دھندے نال اساڈا معاشرہ ہر سطح اُتے متاثر تھئے جیندے نال اساڈے نینگراں اچ ردِعمل اتے ہیجان دی کیفیات وی پیدا تھیاں ہن ۔ اتے اے سوال وی ساری قوت نال سامنڑیں آیا ہے جو اساڈے اسلاف جیہڑے رستے دا تعین کیتا ہئی او درست وی ہے یا کائناں ۔ اے ہک او بنیادی سوال ہے جیندی آواز اساکوں آپ دے انفررادی اتے اجتماعی، ہرعمل اچ سنڑائی ڈینی ہے ۔ انہاں آکھیا جو گزریل پونڑیں صدی دے تجربیاں اتے واقعات و حوادث دے بعد جیکر اساں میثاقِ مدینہ دی مقدس دستاویز دی روشنی اچ معاشرے دی تشکیل نو بارے غورو فکر کریندے پئے ہئیں تاں اے اطمینان دی گالھ ہے ۔ ایندا مطلب اے ہے جو اساڈی سمت درست ہے ۔ ایندے اچ کئی وی شک کائنی جو میثاقِ مدینہ ریاست دے جدید تصور دی پہلی اتے بنیادی دستاویز دی حیثیت رکھیندے ۔
