صدر مملکت ممنون حسین دی میکسیکو اچ پاکستان دے نامزد سفیر تصور خان نال گالھ مہاڑ

اسلام آباد ۔ 5 مئی (اے پی پی) صدر مملکت ممنون حسین آکھے جو پاکستان اتے میکسیکو وچال آپسی وزارتی کمیشن دے احیاء اُتے توجہ ڈتی ونجے تانجو آپسی گانڈھے اچ بیا ودھارا تھی سگے ۔ انہاں اے گالھ میکسیکو اچ پاکستان دے نامزد سفیر تصور خان نال گالھ مہاڑ کریندے ہوئیں آکھی ، جنہاں جمعے کوں ایوان صدر اچ صدر مملکت نال ملاقات کیتی۔ صدر مملکت آکھیا جو پاکستان زرعی ملک ہے اتے میکسیکو نال چاول سمیت بیاں اجناس تے پھلاں دی برآمدات اچ ودھارے سانگے کم کیتا ونجے تاں ملک دی برآمدات اچ ودھارا تھی سگدے ۔ انہاں آکھیا جو تجارت دے ودھارے نال نہ صرف آپسی رابطیاں اچ ودھارا تھیسی ، جڈانجو ملکی زر مبادلہ دے ذخائر اچ وی ودھار تھیسی ۔ صدر مملکت آکھے جو سفارت کار تعلیمی، ثقافتی اتے تجارتی وفود دے تبادلے کوں ترجیح ڈتی ونجے کیونجو انہاں شعبیاں اچ ودھارے نال ملک ترقی آلے پاسے ٹُرسی ۔ انہاں آکھیا جو میکسیکو دی معیشت مضبوط ہے ایں سانگے ایندے نال تجارت اساڈی ترجیح ہونڑیں چاہیدی ہے ۔ صدر مملکت تصور خان کوں میکسیکو اچ پاکستان ولوں سفیر تعینات تھیونڑ تے مبارخ دتی اتے امید کیتی جو او میکسیکو اچ پاکستان دے مثبت پہلو کوں اجاگر کرنڑ سانگے آپنڑیاں ساریاں صلاحیتاں کوں استعمال اچ گھن اون۔