اسلام آباد ۔ 27 مئی (اے پی پی) وزیراعظم دے مشیر برائے خارجہ امور سرتاج عزیز مقبوضہ کشمیر اچ آباد ی دا تناسب وٹاونڑ اتے انسانی حقوق دیاں سنگین خلاف ورزیاں بارے اقوام متحدہ دے سیکرٹری جنرل انتونیو گوئٹر یز دے نال ہک تفصل نال خط لکھے جیندے اچ بھارتی اقدامات بارے تحفظات دا اظہار کریندے ہوئیں انہاں آکھیا جو اقوام متحدہ دی سلامتی کونسل دیاں قرار داداں اُتے عملدرآمد نہ تھیونڑ نال مقبوضہ کشمیر اچ انسانی المیہ رونما تھی سگدے ۔ سلامتی کونسل دی قرارداداں اتے 70 سال پہلے کشمیریاں نال کیتے گئے وعدے اُتے عملدرآمد اقوام متحدہ دی ذمہ داری ہے۔دفتر خارجہ دے ترجمان دے مطابق نیویارک اچ پاکستان دے مسقل مشن ولوں بھیجا گیا خط سلامتی کونسل دے صدر سارے رکن ملکاں اچ تقسیم کیتے۔ تفصیلی خط اچ سیکرٹری جنرل کوں ڈسایا گئے جو کئی ڈھاکیاں توں مقبوضہ کشمیر اچ جاری انسانی حقوق دی صورتحال خاص طور تے وڈے پیمانے تے قتل عام اتے پیلٹ گنز دے استعمال نال بالیں اتے تریمتیں سمیت سینکڑیاں نینگراں دی دید توںمحرومی اتے آبادی دے تناسب اچ تبدیلی بہوں تشویش دی گالھ ہے ۔ خط اچ آکھیا گئے جو بھارت آباد ی دے تناسب اچ تبدیلی نال مقبوضہ کشمیر کوں ہندو ریاست اچ تبدیل کرنڑدی کوشش کرینداپئے ۔مشیر خارجہ اقوام متحدہ کوں بھارتی منصوبیاں بارے سارے اعداد و شمار ،اقدامات اتے شواہد دی تفیصلات وی ڈتیاں ہن ۔ تفصیلات دے مطابق بھارت دی 31 رکنی پارلیمانی قائمہ کمیٹی برائے داخلہ حال ہی اچ ”مغربی پاکستانی مہاجرین”کو ںمستقل بنیاداں تے مقبوضہ کشمیر اچ آباد کرنڑ دی تجویز پیش کیتی ہئی جیندے نال مقبوضہ وادی دے عوام اچ شدید بے چینی پھیل چکی ہے۔حال ہی اچ ہک نویں تجویز وی زیر غور ہے جیندے تحت مقبوضہ کشمیر اچ گھٹ توں گھٹ ترائے سالیں تئیں ملازمت کرنڑآلے بھارتی فوج دے ریٹائرڈ یا جنگ دے دوران ہلاک تھیونڑآلے ملازماں کون زمین ڈتی ویسی ، جڈانجو اے سارا کجھ ریٹائرڈ ملازماں دی فلاح دے ناں تے کیتا ویندا پے ۔
