بیجنگ۔ 13 مئی (اے پی پی) وزیراعظم محمد نواز شریف آکھے جو پاکستان ون بیلٹ ون روڈ منصوبے دی بھرپور حمایت کریندے ، خطے دے استحکام کیتے ایں منصوبے دی تکمیل اچ آپنڑاں بھرپور کردار ادا کرنڑ کیتے چین نال رل تے کم کریسوں ۔ چھنڑ چھنڑکوں بیجنگ دے عظیم عوامی ہال اچ وزیراعظم محمد نواز شریف چین دے وزیراعظم لی کی کیان نال ملاقات کیتی، جیندے اچ جنوبی ایشیاءدے خطے اتے عالمی سطح تے پائیدار اقتصادی ترقی بارے مختلف خطیاں نال رابطیاں اتے تجارت اچ ودھارے بارے گالھ مہا ڑتھئی ۔ ملاقات اچ فریقین چین پاکستان اقتصادی راہداری( سی پیک) اُتے کم دی رفتار دا جائزہ گھدا جو چین دے صدر ژی جن پینگ دا ون بیلٹ ون روڈ نظریہ بہوں اہم اتے بنیادی حصہ ہے ۔ وزیراعظم محمد نواز شریف چین دے وزیراعظم کوں او بی او آر فورم دی میزبانی اُتے مبارخ ڈتی اتے آکھیا جو پاکستان ایں منصوبے کوں پورا کرنڑ دی پوری حمایت کریندے ۔ انہاں خاص طور تے آکھیا جو چین دے دورے کیتے وفد دی تشکیل اچ چارے صوبیاں دے وزرائے اعلیٰ دی شرکت کوں یقینی بنڑایا گئے جیہڑا جو چین پاکستان دوستی دی علامت ہے۔ انہاں آکھیا جو پاکستان ایں گالھ تے یقین رکھیندے جو چین خطے دے امن اتے استحکام کیتے تزویراتی پالیسیاں رکھیندے ۔وزیراعظم آکھیا جو پاکستان سی پیک منصوبے اُتے چین دا بہوں شکر گزرا ہے ، سی پیک خطے دی ترقی اتے استحکام کیتے بہوں زیادہ موقعے ڈیسی ۔ ملاقات اچ وزیراعلیٰ پنجاب شہبازشریف ‘ وزیراعلیٰ سندھ مراد علی شاہ ‘ وزیراعلیٰ خیبر پختونخوا پرویز خٹک ‘وزیراعلیٰ بلوچستان نواب ثناءاللہ زہری ‘ وزیر خزانہ اسحاق ڈار‘ وزیر تجارت خرم دستگیر اتے منصوبہ بندی و ترقی دے وفاقی وزیر احسن اقبال ‘ انفارمیشن ٹیکنالوجی دی وزیر مملکت انوشہ رحمن اتے امور خارجہ بارے وزیراعظم دے مشیر سرتاج عزیز سمیت بئے اعلیٰ حکام وی شریک ہن ۔
