بیجنگ ۔ 13 مئی (اے پی پی) وزیراعظم محمد نواز شریف آکھے جو انہاں دی حکومت چین پاکستان اقتصادی راہداری (سی پیک) منصوبے اُتے موثرعملدرآمد کیتے سارے ممکنہ اقدامات کریندی پئی ہے ، حکومت توانائی اتے بنیادی ڈھانچے دے شعبیاں اچ ترقیاتی منصوبیاں اُتے عملدرآمد اچ موثر کامیابیاں حاصل کیتن ۔ انہاں اے گالہیں چین دے عظیم عوامی ہال اچ چین دے صدر ژی جن پنگ نال چھنڑ چھنڑکوںتھیونڑآلی ہک ملاقات اچ آکھیاں ۔ وزیراعظم محمد نواز شریف ایں موقعے تے آکھیا جو سی پیک منصوبہ چین دے صدر دے ون بیلٹ ون روڈ وژن دا اہم عنصر ہے۔ انہاں آکھیا جو اساں سی پیک منصوبیاں بارے چین دی قیادت دے عزم دی تعریف کریندے ہئیں ۔ وزیر اعظم بیلٹ اینڈ روڈ فورم برائے عالمی ترقی اچ شرکت سانگے بیجنگ اچ ہن ۔ چینی حکومت ولوں 14 اتے 15مئی کوں تھیونڑآلے فورم اچ دنیا دے مختلف ملکاں دے 29 سربراہان مملکت و حکومت شرکت کریندے پن ۔ جڈانجو 130بئے ملکاں دے اعلیٰ سطح دے وفود وی فورم اچ شرکت کریسن۔ عظیم عوامی ہال اچ پجنڑ تے چین دے صدر وزیراعظم دا استقبال کیتا۔ ایں موقعے تے ڈوہائیں ر ہنماوا ں گرمجوشی نال مصافحہ کیتا۔ ایں ملاقات اچ وزیراعظم دے نال پنجاب دے وزیراعلیٰ شہباز شریف‘ وزیراعلیٰ سندھ مراد علی شاہ ‘ وزیراعلیٰ خیبر پختونخوا پرویز خٹک ‘وزیراعلیٰ بلوچستان نواب ثناءاللہ زہری سمیت وزیر خزانہ اسحاق ڈار‘ منصوبہ بندی و ترقی دے وفاقی وزیر احسن اقبال ‘ ریلوے دے وفاقی وزیر خواجہ سعد رفیق ‘انفارمیشن ٹیکنالوجی دی وزیر مملکت انوشہ رحمن اتے امور خارجہ بارے وزیراعظم دے مشیر سرتاج عزیز سمیت بئے اعلیٰ حکام وی شریک ہن ۔ جڈانجو چینی صدر دے نال انہاں دا اعلیٰ سطح دا 9رکنی وفد وی ملاقات اچ موجود ہئی ۔ وزیراعظم چینی صدر نال ملاقات توں کجھ دیر پہلے آپنڑیں چینی ہم منصب لی کیان نال ملاقات کیتی اتے گوادر اچ مخصوص اقتصادی زون دے قیام سمیت بئے ترقیاتی منصوبیاں اُتے تکھے عملدرآمد دی لوڑ اُتے زور ڈتا۔ وزیراعظم محمد نواز شریف آکھیا جو انہاں دے وفد اچ شامل اعلیٰ سطح دے ارکان پاک چین دوستی دے مضبوط تعلقات کوں ظاہرکریندے ہن ۔ انہاں آکھیا جو پاکستان چینی صدر دے ون بیلٹ ون روڈ وژن دے فروغ کیتے چین دے نال کھڑا ہے ۔ وزیراعظم صدر ژی چن پنگ کوں بیلٹ اینڈ روڈ فورم دے کامیاب انعقاد اُتے مبارخ ڈتی اتے آکھیا جو چینی دارالحکومت اچ ساری دنیا دے ر ہنماوا ں دی وڈی تعداد اچ موجودگی چین دی قیادت اُتے عالمی برادری دے ودھدے ہوئے اعتماد کوں ظاہر کریندی ہے ۔ وزیراعظم آکھیا جو پاک چین دوستی کوں پاکستان اچ وڈی سطح تے عوامی پذیرائی حاصل ہے۔انہاں آپسی دوستی دے فروغ کیتے کوششاں کوںبیا تیز کرنڑ دی لوڑ اُتے زور ڈتا۔ ملاقات اچ صدر ژی جن پنگ کانفرنس اچ شرکت کرنڑاُتے وزیراعظم اتے انہاں د ے وفد دا خیرمقدم کیتا ۔انہاں ڈو طرفہ گانڈھے دے ودھارے اتے خطے دی ترقی بارے کیتی ونجنڑآلیاں سانجھیاں کوششاں اُتے اعتماد دا اظہار کیتا آتے آکھیا جو ایندے نال ڈوہائیں ملکاں دے آپسی رابطے بئے مستحکم تھیسن ۔ انہاں آکھیا جو سی پیک اتے علاقائی رابطیاں اچ اضافے دے بئے منصوبیاں دے علاوہ پاکستان اتے چین دے ڈوطرفہ تعلقات اچ اضافے دے وسیع موقعے موجود ہن ۔
