اسلام آباد ۔ 23 مئی (اے پی پی) وزیر مملکت وفاقی تعلیم و تربیت انجینئر محمد بلیغ الرحمن آکھے جو سکولاں توں باہر طلباء دی تعداد کوں صفر اُتے گھن آونڑاں اساڈا ہد ف ہے ۔ تہذیب و تمدن انسانی زندگی دا اہم جزو ہے، ڈوجھیاں دی تہذیب و تمدن توں وی سکھنڑاں چاہیدے ۔ او منگل کوں پاکستان مین پاور انسٹی ٹیوٹ اچ تھیونڑآلی بالیں کوں ایوارڈ ڈیونڑ دی تقریب نال خطاب کریندے پئے ہن ۔ ایں موقعے تے انہاں آکھیا جو تعلیم دی فراہمی حکومت دی ذمہ داری ہے، گزریل ترائے سالیں اچ سکولیں توں باہر طلباء دی تعداد اچ نمایاں گھٹکی تھئی ہے اتے ایں کوںصفر اُتے گھن آونڑ اساڈا ہدف ہے ۔ انہاں آکھیا جو دہشت گردی ہار گئی ہے ، ہنڑ اساڈے بال محفوظ سکولاں اچ تعلیم گھندے پئے ہن ۔ انہاں بالیں اُتے تحقیق اتے علم دے حصول اچ کوششاں کرنڑ اُتے زور ڈیندے ہوئیں آکھیا جو اساڈے نینگر باصلاحیت ہن اتے انہاں کوں ڈیکھدے ہوئیں اساکوں آپنڑان مستقبل روشن ڈیکھائی ڈیندا پئے ۔ بلیغ الرحمن آکھیا جو آپنڑیں بالیں کوں عالمی شہری بنڑاونڑاں ہے ، تہذیب تے تمدن زندگی دا اہم حصہ ہے، ڈوجھیا دی تہذیب و تمدن دی عزت کرنڑیں چاہیدی ہے اتے ایندے توں چنگی شیے سکھنڑیں چاہید ی ہے ۔ انہاں یونیسکو دی تعلیم بارے کوششاں دی تعریف کریندے ہوئیں آکھیا جو پاکستان اچ 263 سکول یونیسکو دے رکن ہن جیہڑے جو ثقافتی تنوع توں سکھدے پئے ہن ۔ انہاں آکھیا جوبئے سکولاں کوں وی ایندا حصہ بنڑنڑاں چاہیدے ۔ ایں موقعے تے انہاں جاپان اچ پاکستان دی نمائندگی کرنڑآلی طالبہ رشیدہ کوں مبارخ وی ڈتی ۔
