اسلام آباد ۔ 10 مئی (اے پی پی) قومی اقتصادی کونسل دی انتظامی کمیٹی (ایکنک) مالیاتی شمولیت تے انفراسٹرکچر منصوبیاں اتے لہور سیالکوٹ موٹروے لنک (چار رویہ) براستہ نارنگ منڈی توں نارو وال منصوبے دی منظوری ڈے ڈتی ۔ ایکنک دا اجلاس وفاقی وزیر خزانہ سینیٹر اسحاق ڈاردی صدارت اچ بدھ کوںتھاں وزیراعظم آفس اچ تھیا۔ ایکنک تفصیلی غوروخوص دے بعد مالیاتی شمولیت تے انفراسٹرکچر منصوبیاں دی 137 ملین ڈالر دی آئی ڈی اے فنڈنگ نال اصولی منظوری ڈتی اتے ہدایت کیتی جو سیکرٹری منصوبہ بندی تے ترقی دی سربراہی اچ ہک کمیٹی منصوبے دی لاگت کوں سکوپ کوں متناسب بنڑیسی ۔ ایکنک قرار ڈتا جو ایں منصوبے دے مقاصد مالیاتی شمولیت دی قومی حکمت عملی نال مطابقت رکھیندے ہن ۔ قومی اقتصادی کونسل دی انتظامی کمیٹی لہور سیالکوٹ موٹروے لنک (چار رویہ) براستہ نارنگ منڈی توں نارو وال منصوبے دی منظوری وی ڈتی۔ 73.35 کلومیٹر لمبی ایں سڑک تے 14 ارب، 18 کروڑ اتے 98 لاکھ روپے دی لاگت امسی ۔ ایکنک ہدایت کیتی ہے جو ایں منصوبے دی مقررہ مدت اچ تکمیل یقینی بنڑائی ونجے ۔ ایندے علاوہ ایکنک گوادر بندرگاہ دی ایسٹ بے اُتے ایکسپریس وے دی تعمیر دی منظوری ڈتی ہے ۔ ایں منصوبے کیتے سی پیک دے تحت حکومت چین ولوں بلا سود قرضے دے ذریعے فنڈنگ کیتی ویسی ۔ 18.98 کلو میٹر لمبی اے سڑک گوادر بندرگاہ کوں مکران کوسٹل ہائی وے دے نال نال فری زون اتے مستقبل دے کنٹینر ٹرمینلز نال جوڑ ڈیسی ۔
