اسلام آباد ۔ 23 مئی (اے پی پی) وفاقی وزیر داخلہ چوہدری نثار علی خان آکھے جو ڈان لیکس دی میڈیا بارے سفارش اُتے اے پی این ایس، سی پی این ای اتے پی بی سی اتفاق رائے نال کوڈ آف کنڈکٹ بنڑاونڑ دی یقین دہانی کروائی ہے، آزادی اظہار رائے اتے سوشل میڈیا اُتے کئی قدغن کائنی لیندے پئے جڈانجو کئی وی جمہوری ملک سوشل میڈیا کوں مادر پدر آزادی کائنی ڈے سگدا۔ قنون اتے آئین دے مطابق سوشل میڈیا بارے ریڈ لائن لا ڈیسوں ۔ سوشل میڈیا بارے مسلیاں کوں حل کرنڑ کیتے ساریاں خدمات ڈیونڑ آلیاں نال گالھ کریسوں جو او پاکستان اچ آپنڑیں دفتر بنڑاون، سوشل میڈیا دے ایس او پی سیاسی جماعتاں دے اتفاق رائے نال بنڑاونڑ کیتے سپیکر قومی اسمبلی کو ںخط لکھساں، کجھ لوک بغیر کہیں وجہ دے سوشل میڈیا چاچے مامے بنڑدے پئے ہن انہاں کوں چاہیدے جو او سوشل میڈیا اُتے توہین آمیز مواد کو ں ہک واری لازمی ڈیکھ گھنن، کامران کیانی سمیت باہرلے ملک کہیں وی ملزم دے انٹرپول قنون دے مطابق ریڈ وارنٹ جاری کریسوں۔ پاک فوج دے حوالے نال تضحیک آمیز مواد اپ لوڈ کرنڑاُتے ہنڑ تئیں 27 آئی ڈیز دی شناخت تھئی ہے ، ایں معاملے اچ شامل افراد دے انٹرویوز ایف آئی اے کریندی پئی ہے ، جیہڑے وی ملوث پاتے گئے انہاں دے خلاف قنون دے مطابق کارروائی کیتی ویسی ۔ منگل کوں پنجاب ہائوس اچ پریس کانفرنس نال خطاب کریندے ہوئیں وزیر داخلہ چوہدری نثار علی خان اے گالہیں آکھیاں۔ انہاں آکھیا جو ڈان لیکس بارے کمیٹی دی رپورٹ کجھ ڈینھ پہلے ملی ہے جیندے اُتے وزارت داخلہ نوٹفیکیشن جاری کیتے، کمیٹی دی آخری سفارش دے علاوہ ساریاں سفارشات اُتے عملدرآمد تھی گئے ۔ آخری سفارش جیندے اچ میڈیا کیتے کوڈ آف کنڈکٹ بنڑاونڑ دا آکھیا گیا ہئی اوندے اُتے عملدرآمد کیتے گزریل ڈینھ پاکستان براڈ کاسٹنگ ایسوسی ایشن دے رکناں نال ملاقات تھئی اتے اج سی پی این ای، اے پی این ایس اتے سینئر صحافیاں نال ایں بارے گالھ تھئی ہے ، جیندے اچ حکومت اتے میڈیا دے گانڈھے ، میڈیا دے مسلیاں ، پیشہ وارانہ پہلو، ایڈمنسٹریٹو اتے سیکورٹی دے امور اُتے گالھ مہاڑ تھئی ہے ۔
