وزیراعظم دے خصوصی طیارے توں ۔ 12 مئی (اے پی پی) وفاقی وزیر ریلوے خواجہ سعد رفیق آکھے جو ”ون بیلٹ ون روڈ” فورم پاکستان دے مواصلاتی شعبے خاص طور تے ریلوے کوں چنگا کرنڑ اچ مددڈیسی ۔ جمعے کوں فورم اچ شرکت سانگے وزیراعظم نواز شریف دے نال بیجنگ ویندے ہوئیں وزیر ریلوے ”اے پی پی” نال گالھ مہاڑ کریندے ہوئیں آکھیا جو پاک۔چین اقتصادی راہداری منصوبہ ملک اچ خوشحالی دے نویں دور کوں شروع کرنڑ کیتے ہک گیم چینجر ہے۔ انہاں آکھیا جو وڈا منصوبہ رکھنڑآلا اے فورم چینی صدر سی جن پنگ دا وژن ہے جیندا مقصد علاقے اچ مضبوط رابطیاں کوں فروغ ڈیونڑاں ہے ، ایں وژن اچ وزیراعظم محمد نواز شریف و ی سی پیک دے تحت شریک ہن ۔ سعد رفیق آکھیا جو کراچی توں لنڈی کوتل، طورخم تئیں ریلوے ٹریک کوں اپ گریڈ کیتا ویسی اتے ایں رستے اُتے ریل گاڈیاںدی رفتار 80 توں ودھ تے 160 کلومیٹر فی گھنٹہ تئیں ڈوڑی تھی ویسی ، ایندے نال نال سگنل دا نظام وی بہتر تھیسی ۔ انہاںآکھیا جو لہور توں کراچی تئیں ریل گاڈی دی مسافت 8 توں 12 گھنٹے گھٹ تھی ویسی اتے لہور توں اسلام آباد دا سفر وی 2 گھنٹے گھٹ تھی ویسی ۔ وزیر ریلوے آکھیا جو وزیراعظم دے دورے دے دوران پاکستان اتے چین وچال کراچی توں پشاور تئیں مین لائن۔ون (ایم ایل 1) دی بحالی اتے اپ گریڈیشن دا نواں طریقہ کار طے تھیونڑ دی وی توقع ہے ۔ دورے دے دوران وزیراعظم دے نال چارے وزراء اعلیٰ دی موجودگی، بارے سوال دے جواب اچ انہاں آکھیا جو اے عالمی برادری کوں ہک واضح پیغام ہے جو قومی اہمیت دے معاملیاں اُتے ساریاں سیاسی جماعتاں ہک مٹھ ہن ۔ انہاں آکھیا جو اساں سیاسی جماعتاں دے نمائندیاں دی حیثیت نال ہی نہیں جڈانجو پاکستانی دی حیثیت نال چین دا دورہ کریندے پئے ہئیں ، قومی امور اُتے اے یکجہتی جمہوریت دا حسن ہے۔
