اسلام آباد ۔ 5 مئی (اے پی پی) صدر مملکت ممنون حسین آکھے جو پاکستان اتے جاپان قریبی دوست اتے قابل اعتماد معاشی سانجھے دار ہن ، پاکستان تجارتی، کاروباری، توانائی اتے تعمیری صلاحیتاں اچ ودھارا چاہندے ۔ اے گالھ انہاں جاپان اچ پاکستان دے نامزد سفیر ڈاکٹر اسد مجید خان نال گالھ مہاڑ کریندے ہوئیں آکھی، جنہاں جمعے کوں ایوان صدر اچ صدر مملکت نال ملاقات کیتی۔ صدر مملکت سفیر نامزد تھیونڑ تے ڈاکٹر اسد مجید خان کوں مبارخ ڈتی اتے امید کیتی جو او جاپان کوں نیوکلیئر سپلائرز گروپ (این ایس جی) اُتے پاکستان دے مؤقف دی حمایت کرنڑ سانگے راضی کر یسن اتے اے انہاں دا اہم مقصد ہونڑاں چاہیدے ۔ صدر مملکت آکھیا جو ڈوہائیں ملکاں وچال تجارت دے ودھارے دی لوڑ ہے تانجو گانڈھے کوں بیا ودھایا ونجے سگے ۔ انہاں آکھیا جو جاپان اچ سرمایہ کاری دا ودھ سارا رجحان ہے ایں سانگے پاکستان وی جاپان اچ برآمدات اچ ودھارا چاہندے ۔ انہاں نامزد سفیر اُتے زور ڈتا جواو جاپانی سرمایہ کاراں کوں پاکستان اچ سرمایہ کاری سانگے مناون ۔ صدر مملکت سفیر کوں ہدایت کیتی جو جاپان اچ پاکستانی لیبر کوں روزگار ڈیونڑ دے موقعے پیدا کیتے ونجن ۔ ایں بارے 2020ء اچ ٹوکیو اچ تھیونڑآلے اولمپکس کھیڈاں اچ پاکستانی افرادی قوت کوں کھپایا ونج سگدے ۔
